Xhorxhia ka miratuar një projektligj që ndalon përdorimin e celularëve në shkollat fillore. Ky ligj, që synon përmirësimin e shëndetit mendor dhe shoqërimit të studentëve, pritet të miratohet nga guvernatori.
Aktualisht, nëntë shtete amerikane kanë masa të ngjashme për përdorimin e telefonave në shkolla.
Senatorët në shtetin e Xhorxhias kanë miratuar një projekt-ligj që do t’i ndalojë nxënësit e shkollave fillore të përdorin telefonat celularë gjatë ditës së shkollës, raportoi AP. Masa do t’i përcillet guvernatorit republikan të Xhorxhias, Brian Kemp për miratim ose veto.
Aktualisht, nëntë shtete amerikane ndalojnë telefonat në shkolla dhe ligje të ngjashme janë në pritje të miratimit nga guvernatorët e New Mexico, Tennessee dhe Utah, dhe këto masa priten së shpejti në shtetet e tjera, tha agjencia. “Ky projekt-ligj nuk ka të bëjë vetëm me akademikët, por ka të bëjë me mirëqenien e studentëve”, tha senatori Jason Anavitarte nga Dallas, Georgia, gjatë një debati mbi Projektligjin 340 të Dhomës së Përfaqësuesve të martën. Ai vuri në dukje se studimet e lidhin përdorimin e tepërt të telefonit me problemet e shëndetit mendor, uljen e aftësive sociale dhe rritjen e dhunës nga bashkëmoshatarët.
“Ne duam që studentët të përqendrohen në shoqërimin me miqtë e tyre në klasë gjatë orëve të shkollës”, shtoi ai.
Në nivel kombëtar, 77 për qind e shkollave amerikane ndalojnë telefonat celularë në shkolla për përdorim joakademik, sipas Qendrës Kombëtare për Statistikat e Arsimit. AP thekson se ky numër mund të jetë i pasaktë, për shkak të mundësisë që këto masa të mos zbatohen nga të gjitha shkollat apo që nxënësit të mos i respektojnë ato.
Arkansas, Kaliforni, Florida, Indiana, Luiziana, Minesota, Ohio, Karolina e Jugut dhe Virxhinia kanë miratuar masa që ndalojnë ose kufizojnë studentët të përdorin telefonat celularë në shkolla.
© Portali Shkollor
