“Në janar do të vendoset vlera e koeficientit. Nuk mund ta përcaktojmë koeficientin me Ligjin e Pagave, por me buxhet. Po kërkoj pak durim prej juve, saktësisht në janar të vitit 2023”. Kështu deklaroi kryeministri Albin Kurti më 24 dhjetor.
Për ta mbajtur këtë premtim Kurti ka afat veç edhe pak orë, pasi është dita e fundit e muajit janar, ndërsa koeficienti i Ligjit të Pagave vazhdon të mbahet i fshehtë.
Ndërsa orët po ecin dhe vlera e koeficientit nuk po publikohet, në anën tjetër mësimdhënësit nuk e dinë se çfarë page do të marrin nesër apo pasnesër, kurdo që i ekzekuton Ministria e Financave.
Ndërsa mësimdhënësit janë në pritje, ministrja e Arsimit, Arbërie Nagavci, nuk është bërë e ‘gjallë’ sot as në rrjetet sociale, shkruan Albanian Education.
Ndërsa dje ajo ka njoftuar se ka nënshkruar Udhëzimin Administrativ “Zgjedhja, themelimi dhe funksionimi i Këshillit të Prindërve”, sot ende deri më tani nuk ka një postim nga ajo.
Nagavci me 3 janar kishte deklaruar se nuk është në kompetencat e saj të përcaktojë këtë koeficient, teksa sipas saj sfidë mbetet ngritja e cilësisë së arsimit në vend.
“Vlera e koeficientit do të përcaktohet shumë shpejt në Qeveri. Nuk është në kompetencat e mia të plota të flasë për këtë, por besoj se koeficienti do të reflektojë edhe rritjen ekonomike. Sektori i arsimit është përfitues i të gjitha ndryshimeve dhe koeficienteve që janë planifikuar në Ligjin e Pagave. Por sfida mbetet ngritja e cilësisë në arsim e jo vetëm koeficientët”, ka deklaruar Nagavci në RTK.
Kurse Rrahman Jasharaj nga SBASHK ka deklaruar se për ta është e papranueshme koeficienti nën 120 euro.
Mbetet të shihet nesër nëse Qeveria do të publikojë vlerën e koeficientit.
Rrahman Jasharaj: Misteri i pagave, e papranueshme koeficienti nën 120 euro
