Kur kanë mbetur edhe rreth dy javë për fillimin e vitit të ri shkollor, në disa shkolla janë duke u kryer ende rinovime. Në një numër sosh, ato pritet të mos përfundojnë as më 1 shtator.
Punëtorë të kompanive të angazhuara u shprehën skeptikë se punimet mund të përfundojnë deri më 1 shtator.
Në Këshillin e Prindërve të Kosovës e kanë quajtur shqetësuese që çdo vit renovimet në institucionet arsimore fillojnë me vonesë.
Kryetari Besnik Dragusha ka thënë se rinovimet duhet të fillojnë menjëherë pas përfundimi të vitit të shkollor dhe jo në mes të pushimit veror.
“Kjo është gjë e mirë që ndodhin rinovime në shkolla, mirëpo është problematika që po vazhdon qe disa vite që nuk është vetëm e këtij viti por edhe viteve të tjera – renovimi i shkollave nuk po fillon menjëherë pas përfundimit të semestrit”, ka thënë Dragusha. “Sigurisht nuk është pozitive. Për me tepër është negative për nxënësit e atyre shkollave, për arsye se procesi mësimor po shtyhet dhe nuk po mbahet në orarin kalendarik në të cilën është paraparë”.
Përpos problematikës së nisjes së vitit të ri shkollor me zhurmën e renovimeve, nxënësit, rrezikojnë që 1 shtatorin ta presin edhe pa tekste shkollore, meqë shpërndarja e tyre ende nuk ka filluar nga Ministria e Arsimit. Sivjet përveç që nuk ka filluar shpërndarja e teksteve, as procesi i përzgjedhjes së librave nga shkollat nuk ka përfunduar.
Sipas praktikave të mëhershme, Ministria ka dërguar katalogët e librave në shkolla, ku secili mësimdhënës përzgjedh librin që i përshtatet për mbajtjen e lëndës. Pas një jave lista me librat e përzgjedhur dërgohet nga Drejtoria komunale e Arsimit në ministri. Pastaj duhet mbi 2 javë për të pritur shpërndarjen e tyre. /KOHA/
