Vesa Xhymshiti është përzgjedhur zyrtarisht të përfaqësojë Kosovën në Olimpiadën Evropiane Matematike për Vajza (European Girls’ Mathematical Olympiad – EGMO) 2026.
Pas Testit Selektues (TST EGMO 2026), ku garuan nxënëset më të mira nga klasa VII–XII në nivel vendi, Vesa zuri vendin e parë. Një arritje e jashtëzakonshme, veçanërisht duke qenë vetëm në klasën e tetë.
EGMO është olimpiada më prestigjioze ndërkombëtare për vajza në matematikë, e organizuar posaçërisht për nxënëse të shkollave të mesme që kanë interes dhe talent për matematikë përtej programit të rregullt shkollor.
Në këtë olimpiadë marrin pjesë rreth 60 shtete nga e gjithë bota, përfshirë Shtetet e Bashkuara të Amerikës, Kanadanë, Australinë, Kinën, Japoninë, Indinë e të tjera, si dhe shumë shtete evropiane.
EGMO 2026 do të mbahet në Bordeaux, Francë, nga 9–15 prill 2026.
Vesa ishte pjesë e ekipit të Kosovës edhe në EGMO 2025, si pjesëmarrësja më e re ndonjëherë në EGMO, ku fitoi Mirënjohje Nderi.
Kosova përfaqësohet me dinjitet. 🇽🇰
