Ka vdekur mësimdhënësi Hajredin Ademi nga Bujanoci. Njoftimin e ka dhënë shkolla “Sezai Surroi”, në Bujanoc, shkruan AlbanianEducation.net.
Njoftimi:
Me dhimbje e pikëllim të thellë morëm kumtin për vdekjen e profesor Hajredin Ademit
Me dhimbje e pikëllim të thellë morëm lajmin e trishtë për ikjen nga kjo botë të profesorit të nderuar, Hajredin Ademit, mësimdhënës në shkollën e mesme “Sezai Surroi”, në Bujanoc. Profesori Hajredin Ademi ka vdekur të premten mbrëma, në spitalin e Vranjës, në prag të pensionit, në moshën 64 vjeçare.
Kumti për vdekjen e profesorit Hajredin qe i vështirë për ne që e njohëm dhe për ata që bashkëpunoi dhe bashkëveproi për dekada me radhë, si në arsim, po ashtu duke qenë edhe pjesëmarrës i UÇPMB-së, njëherësh edhe bashkëpunëtor i ngushtë i Ridvan Qazimit (Komandant Lleshit). Puna e tij edukative në arsimimin dhe edukimin e gjeneratave të reja, është vlerësuar lartë nga nxënësit dhe banorët e kësaj komune.
Ne kolektivi i shkollës dhe nxënësit e tij do ta kemi mall për jetë, komunikimin e tij modest e të çiltër prej një njeriu të virtytshëm, çfarë qe gjatë tërë jetës ai, i këndshëm për biseda, i dashur për miq e farefis dhe me kolektivin e shkollës. Ndaj dhe krenohemi me punën e tij të devotshme prej mësimdhënësi dhe edukatori dhënë shkollës sonë – këtij Tempulli të diturisë.
Edhe drejtori dhe kolektivi i shkollës së mesme “Sezai Surroi”, u shprehin ngushëllime më të sinqerta familjes së profesorit, Hajredin Ademit, i cili përveç që ishte një arsimdashës, pedagog dhe edukator i mirë dhe i dinjitetshëm, ishte edhe atdhetar i madh.
Me ngushëllimet më të sinqerta për familjen, kolektivin e shkollës, farefisin, miqtë dhe dashamirët e tij. Zoti e mëshiroftë profesorin e nderuar dhe mësimdhënësin e devotshëm, që ishte një burrë i urtë dhe intelektual i dalluar dhe i përkushtuar për çështjen e arsimit dhe të interesit kombëtar.
U prehtë në paqe shpirti Juaj në botën e amshuar!
Zoti të mëshiroftë profesor! Ndjehemi krenarë me punën dhe veprimtarinë Tuaj arsimore dhe atdhetare! Lavdi punës dhe veprës Tuaj!
IN MEMORIAM – Hajredin Ademi
Hajredin Ademi, lindi më 20.08.1960 në Tërnoc, komuna e Bujanocit. Shkollën fillore e ka kryer në Tërnoc, kurse atë të mesme në Bujanoc. Studimet e larta i ka vazhduar në Fakultetin e Shkencave Politike – drejtimi Mbrojtje dhe Siguri, në Universitetin e Sarajevës.
Pas mbarimit të fakultetit ka punuar për tetë vjet si profesor i lëndës Mbrojtje dhe Siguri në shkollat fillore të Tërnocit, Bujanocit dhe Lluçanit. Prej vitit 2001-2005 ka punuar në OSBE si koordinator në qendrën për resurset e komuniteteve, kurse prej vitit 2005-2012 ka punuar në organizatën joqeviritare “Nansen Dialogue Center”, organizatë e cila ka sjellë rezultate të mëdha në dialogun mes komuniteteve. Gjatë angazhimit të tij në këtë organizatë ka takuar personalitete të rëndësishme të rajonit dhe Evropës, si: ambasadorë, negociatorë, vëzhgues, etj.Në vitin 2013 ka qenë drejtor i Organizatës Publike Turistike.
Prej vitit 2013-2016 ka qenë drejtor i organizatës publike Radio Televizioni i Bujanocit.Prej tetorit të vitit 2017 punon si profesor në shkollën e mesme “Sezai Surroi” në Bujanoc.
Përveç karrierës profesionale, është marrë edhe me aktivitete politike në kohërat më të vështira në pluralizmin politik, ku edhe ishte kryetar i Kuvendit të Referendumit të 1 dhe 2 marsit të vitit 1992 për fshatin Tërnoc. Ka qenë pjesëmarrës i UÇPMB-së, njëherësh edhe bashkëpunëtor i ngushtë i Ridvan Qazimit (Komandant Lleshit). Ështëbaba i dy fëmijëve; një djali dhe një vajze.
