Ka vetëm katër vjet prej se ushtron në gjimnastikë, por medalje ka fituar thuajse në secilin vend ku ka garuar.
Këto medalje Valza Rama i ka ekspozuar në dhomën e saj, për ta rikujtuar përherë ngazëllimin e përjetuar sa herë që ishte shpërblyer.
“Kam katër vjet prej se ushtroj gjimnastikë. I kam disa medalje që i kam marrë në gara ndërkombëtare. Kam qenë në gara në Itali, Slloveni dhe Greqi”, thekson 14-vjeçarja.
Gjimnastja nga Hajvalia thotë se në hapat e parë nuk kishte njohuri për këtë sport, por thekson se përkushtimi në stërvitje ia shtroi rrugën drejt suksesit.
Për të shkuar deri te salla e stërvitjeve përcillet nga babai i cili e shoqëron në të shumtën e rasteve.
Me të hyrë në sallë ajo shndërrohet në një gjimnaste që në thelb i njeh teknikat e këtij sporti.
Eleganca prej sportisteje e zbatimi me përpikëri i disiplinave që i kërkon gjimnastika e dalluan Valzën në syrin e trajnerëve.
“Valza ka qenë ndër sportistet e para që ka ardhur në Klubin e Gjimnastikës “Elita”. Që kur ka hyr në këtë sallë është vërejtur fiziku, eleganca e saj. Natyrisht stërvitjet e para janë më të vështira, por puna e saj ka dhënë rezultat”, shprehet trajnerja Abeliana Bregu.
Përkrahja nga prindërit nuk i kishte munguar në asnjë moment gjimnastes nga Hajvalia.
“Si prind i kisha sugjeruar të gjithë prindërit që fëmijëve të tyre në bazë të talentit t’iu ndihmojnë në krejt format. Valëza që prej fillimit e ka pasur përkrahjen time dhe do ta ketë gjithmonë”, është shprehur babai i gjimnastes.
Stërvitjet Valza i kryen tri deri në katër herë gjatë javës, ndërsa më intensive ato i ka kur janë në pyetje paraqitjet jashtë vendit.
