Këshilli Drejtues i Universitetit të Prishtinë, ka marrë vendim që t’ua ndalojë profesorëve që të angazhohen edhe në kolegje apo institucione private.
Ky vendim është marrë në mbledhjen e mbajtur gjatë ditës së enjte.
Për të marrë një përgjigje për këtë vendim të UP-së, AlbanianEducation.net ka marrë një përgjigje nga ish-zëvendësministri i Arsimit, Dukagjin Pupovci.
Ai thitë se ky vendim është i arsyeshëm, pasi në kushtet e tanishme, kolegjet private janë konkurrencë për UP-në, ndërkaq, personeli akademik është pasuria kryesore e një institucioni të arsimit të lartë, i cili i jep identitet vet institucionit.
“Besoj se UP është dashur të merr vendim edhe për ndalimin e angazhimit të stafit të vet akademik në universitetet tjera publike në Kosovë, pasi në shumë raste ata angazhohen për mësimdhënie në programe të njëjta që i ka UP-ja. Për shembull, në universitetet publike në Kosovë janë 5 programe studimi për drejtësi dhe 4 për mësuesi, e ka edhe shumë të tjera të ngjashme, ku, me ose pa dashje, ekziston konkurrenca në mes të vet universiteteve publike”, thotë Pupovci për AlbanianEducation.net.
I pyetur nëse edhe universitetet tjera publike në vend duhet të marrin vendim të tillë, Pupovci thotë se ato janë në një pozicion tjetër dhe shpesh shkëmbejnë stafin akademik me njëri-tjetrin për t’i mbajtur programet.
“Mendoj se ky është një moment i përshtatshëm që ato të fillojnë të punojnë drejt profilizimit, duke i mbajtur ato programe për të cilat kanë staf akademik të kualifikuar dhe për të cilat realisht ekziston nevoja”, thotë Pupovci. /AlbanianEducation.net.
