Këshilli Drejtues i Universitetit të Prishtinë, ka marrë vendim që t’ua ndalojë profesorëve që të angazhohen edhe në kolegje apo institucione private.
Ky vendim është marrë në mbledhjen e mbajtur gjatë ditës së enjte.
Për të marrë një përgjigje për këtë vendim të UP-së, AlbanianEducation.net ka marrë një përgjigje nga profesori universitar, Blerim Rexha.
Ai e mirëpret këtë vendim duke thënë se tani UP garon për tregun e njëjtë – për 21 maturantë.
“Në rend të parë tregon se tregu i arsimit të lartë në Kosovë është stabilizuar dhe institucionet publike më në fund po i marrin seriozisht konkurrencën nga institucionet private të arsimit të lartë. Të gjithë ne tani garojmë për tregun e njëjtë – për këta 21 mijë maturantë nga shkollat e mesme”.
“E dyta, profesorët universitar nuk duhet të shndërrohen në profesorë të shkollës së mesme që ligjëratën/mësimin e njëjtë e përsërisin në disa vende tjera – kjo aspak nuk i kontribuon zhvillimit akademik të institucionit dhe vendit në përgjithësi.
E fundit, po jo nga rëndësia, mendoj se vendimi edhe pse i vonuar është i qëlluar, sepse sikurse në çdo fushë tjetër nuk mundemi të punojmë edhe për vete edhe për konkurrencën. Prandaj është shumë mirë, për të gjithë, që po shuhet ky paradoks!”, thotë profesori Rexha për AlbanianEducation.net.
I pyetur nëse duhet të merret ky vendim nga të gjitha Universitetet publike që janē në Kosovë, profesori Rexha uron që edhe ata të ndjekin rrugën e njëjtë.
“Mendoj se Universiteti i Prishtinës është lider edhe në vendosjen e rregullave në shoqëri, dh uroj që diçka të ngjashme të ndjekin edhe universitet dhe organizatat tjera publike, sepse institucionet private e kanë pas në fuqi që moti”, thotë profesori Rexha. /AlbanianEducation.net/.
