Shkarkimi i një profesori të Universitetit të New Yorkut (NYU), i cili ishte subjekt i një peticioni nga studentët që thanë se lënda e tij ishte shumë e vështirë, vazhdon të ngjall polemika, pasi disa prindër dhe mësues thonë se incidenti tregon një ulje të standardeve akademike.
Maitland Jones Jr, një profesor i kimisë organike, u pushua nga puna nga NYU pasi më shumë se 80 studentë nga klasa e tij me 350 studentë nënshkruan një peticion duke u ankuar për notat, mësimdhënien dhe ndihmën e marrë rreth mësimit gjatë pandemisë COVID-19.
Jones, 84 vjeç, mori një mesazh nga dekani i shkencës në gusht për ndërprerjen e kontratës së tij, raportoi New York Times.
Profesorët e kimisë që kundërshtonin vendimin u shkruan disa dekanëve të NYU, duke thënë se ishin të shqetësuar se rasti mund të minonte lirinë e fakultetit dhe të dobësonte praktikat e mësimdhënies.
Jones, një profesor i njohur gjerësisht për shkrimin e një libri shkollor të kimisë organike, tha për Times se kishte menduar të dilte në pension, por ishte i shqetësuar se çfarë do të thoshte vendimi i NYU-s për profesorët tjerë dhe fakultetin.
Një zëdhënës i universitetit mbrojti vendimin për shkarkim duke theksuar tërheqjen e madhe të studentëve nga klasa dhe vlerësimet e këqija. Deklarata tha se vendimi bazohej në ankesat për mospërfillje dhe mungesën e transparencës në notim.
Disa studentë besojnë se pandemia ndërpreu plotësisht aftësinë e tyre për t’u përgatitur për klasa të tilla si kimia organike, një lëndë themelore për ata që shpresonin të vijonin shkollën e mjekësisë.
Disa prindër e mendojnë ndryshe. Ata thonë se vendimi i NYU-s është tregues i një problemi në sistemin e shkollës që ata besojnë se është shumë i butë ndaj studentëve.
paguajmë për edukim në një universitet me reputacion, ne duhet të presim profesorë cilësorë të sfidojnë intelektualisht studentët tanë, duke i ndihmuar të rriten duke i shtyrë ata përtej asaj që është e rehatshme dhe e favorshme për ta”, ka thënë një nga prindërit.
© KOHA.
