Afati i janarit për vlerësimin e studentëve të Universitetit “Fehmi Agani” në Gjakovë ende nuk është hapur pasi nuk është miratuar Kalendari Akademik për vitin akademik 2025/2026.
Këtë e ka konfirmuar rektori Drilon Bunjaku, i cili tha se Kalendari Akademik qëllimshëm nuk u miratua nga Senati i Universitetit “Fehmi Agani” në dy ftesat që u ka dërguar për ta votuar përmes adresës elektronike më 15.01.2026 dhe 17.01.2026.
“Nuk është miratuar Kalendari Akademik për shkak të mosdeklarimit të votës të disa prej senatorëve përmes emailit zyrtar, rrjedhimisht për shkak të mungesës së kuorumit” – ka thënë Bunjaku më 21.01.2026.
KALLXO.com u ka dërguar pyetje senatorëve të Universitetit “Fehmi Agani” nga data 21.01.2026 për votimin e tyre në lidhje me Kalendarin Akademik.
Senatorët e Universitetit “Fehmi Agani”, të cilët i ka konfirmuar Bunjaku si kryesues i Senatit, janë: Ilmi Hoxha, Elsa Vula, Labinot Berisha, Haxhi Kamberi, Ferdi Kamberi, Nexhmije Kastrati, Sindorela Doli-Kryeziu, Artan Nimani, Abedin Sadrija dhe Granit Kelmendi. Asnjëri nuk është përgjigjur në pyetjet e KALLXO.com deri në publikimin e artikullit.
“Përmes mosmiratimit të Kalendarit Akademik dëmtohen drejtpërdrejt studentët dhe mbarëvajtja e procesit të vlerësimit dhe po ashtu u shkelet e drejta studentëve e cila është e garantuar përmes Statutit dhe legjislacionit në fuqi” – ka shtuar Bunjaku.
Ndërsa, nga Parlamenti Studentor i Universitetit “Fehmi Agani” kanë reaguar ndaj kësaj situate duke kërkuar thirrjen e një mbledhjeje urgjente nga rektori i Universitetit, në të cilën kërkojnë të jenë të pranishëm përfaqësuesit studentorë, anëtarët e Këshillit Drejtues dhe të Senatit.
“Jemi në pritje të thirrjes së kësaj mbledhjeje dhe shpresojmë që të zhvillohet sa më shpejt, për të sqaruar të gjitha shqetësimet e studentëve dhe për të marrë vendime konkrete” – ka thënë studenti Besmir Pepshi.
Studenti Besmir Pepshi ka thënë për KALLXO.com se është kryetar i Parlamentit Studentor të Universitetit “Fehmi Agani” nga muaji tetor 2025. Ai po ashtu bëri të ditur se merr pjesë në mbledhjet e Senatit të Universitetit, por nuk ka të drejtë vote.
Pepshi ka treguar se kanë marrë ankesa nga studentët në lidhje me vonesën e hapjes së afatit të janarit.
“Komunikimi me studentët bëhet vazhdimisht përmes rrjeteve sociale por jo me i jep frikë dhe panik edhe grupeve të komunikimit, duke i informuar dhe qetësuar ata që të mos ndalen së mësuari. Qëllimi ynë është të sigurojmë që studentët të jenë të përgatitur dhe të mos ndihen të pasigurt për procesin” – është shprehur Pepshi.
Në paragrafin 2 të nenit 111 në Statutin e Universitetit “Fehmi Agani” thuhet “Afatet e provimeve përfshijnë afatin e dimrit (janarit), pranverës (qershorit) dhe vjeshtës (shtatorit). Periudha e saktë për çdo afat është e përcaktuar me kalendarin e përgjithshëm të studimeve, i cili është i pranuar nga Senati dhe i hapur për publikun. Hollësitë rreth datës së fillimit dhe përfundimit të secilit afat të provimeve përcaktohen nga këshillat e njësive akademike.”
Ndërsa, paragrafi 3 i nenit 111 të Statutit përcakton se “oraret e afateve të provimeve, ku janë të përfshira oraret ditore, shpallen në fillim të vitit akademik.”
Pepshi theksoi se çdo pengesë që ndikon te studentët ndikon edhe tek ai.
“Procesi i votimit për miratimin e Kalendarit Akademik për vitin 2025/2026 është i rihapur dhe do të vazhdojë deri të hënën. Ky afat është vendimtar për të siguruar se çdo vendim i Senatit është i dokumentuar dhe i diskutuar plotësisht” – thuhet në përgjigjen e Pepshit më 22.01.2026.
Teksa thot se kjo është çështje e ndjeshme dhe thelbësore për studentët, Pepshi zotohet se do të vazhdojnë të merren me zgjidhjen e kësaj çështjeje.
“Derisa presim që Universiteti të gjejë një zgjidhje, nuk është paraqitur ndonjë ankesë zyrtare në Ministrinë e Arsimit. Qëllimi është të zgjidhet situata në nivel institucional pa nevojën e ndërhyrjeve të jashtme. Por, sot kryetari i Këshillit Studentor të Fakultetit të Filologjisë (A.R.) ka dërguar një kërkesë publike në Ministrinë e Arsimit, Shkencës, Teknologjisë dhe Inovacionit (MASHT). Presim për përgjigje” – ka njoftuar ai.
Rektori Bunjaku ka thënë se ka njoftuar Ministrinë e Arsimit për mosmiratimin e Kalendarit Akademik dy herë, më 16.01.2026 dhe 19.01.2026.
Për mosmiratimin e Kalendarit Akademik dhe për pasojë edhe moshapjen e afatit të janarit në Universitetin e Gjakovës, KALLXO.com e ka pyetur edhe Arbërie Nagavcin, ministren në detyrë të Arsimit dhe dy zëvendësit e saj, Taulant Kelmendin dhe Arsim Ademin. Por, ende nuk kanë dhënë ndonjë përgjigje.
Në anën tjetër, rektori Bunjaku njoftoi fillimisht më 19.01.2026 për mosmiratimin e Kalendarit Akademik në profilin e tij në Facebook duke iu drejtuar studentëve. E një ditë më pas, e ka shpërndarë këtë njoftim duke thënë “I inkurajoj të gjithë studentët e UFAGJ-së që të kërkojnë të drejtën e tyre të cenuar! Njëkohësisht, i mbështes në çdo pikëpamje, përfshirë edhe ushtrimin e protestës paqësore.”
I pyetur për postimin e datës 21.01.2026, Bunjaku tha se personalisht ka qenë gjithmonë dhe është në mbështetje të studentëve. Ai vlerëson se studentët janë arsyeja përse ekzistojnë universitetet.
“Si rektor e kam për obligim t’u ofroj kushte më të mira, programe cilësore për studime të cilat janë në harmoni me kërkesat e tregut të punës, t’i mbështes ashtu që të mos u mohohet asnjë e drejtë e tyre e cila është e garantuar me Statut dhe me legjislacionin në fuqi. Përmes njoftimit publik që kam bërë në rrjetin social Facebook, e kam konfirmuar mbështetjen time në çdo aspekt duke mos e anashkaluar edhe ushtrimin e protestës paqësore për të drejtat e studentëve që po ua mohojnë qëllimshëm disa senatorë” – ka shtuar Bunjaku.
Kurse, Pepshi për mbështetjen e rektorit për protestë paqësore tha se është i informuar, por se për momentin nuk ka diskutim të hapur për protestë në këshillat e fakulteteve, pasi fokusi i tyre është të arrijnë një zgjidhje pa tensione dhe pa masa radikale.
“Ne e konsiderojmë këtë hapje të mundshme vetëm si një mjet për të siguruar që të drejtat e studentëve të respektohen, nëse situata do të kërkojë ndërhyrje të tillë” – ka thënë Pepshi.
Pepshi e ka përmendur edhe një reagim zyrtar të Parlamentit Studentor të Universitetit “Fehmi Agani” në Facebook për afatin e provimeve, në të cilin tregojnë komunikimin me Rektorat dhe Senat për këtë çështje.
Për dallim nga Universiteti i Gjakovës, afati i janarit për vitin akademik 2025/2026 është hapur në Universitetin e Prishtinës, Universitetin “Ukshin Hoti” në Prizren, në Universitetin “Kadri Zeka” në Gjilan dhe në Universitetin e Shkencave të Aplikuara në Ferizaj.
Në anën tjetër, Drilon Bunjaku ishte zgjedhur rektor i Universitetit “Fehmi Agani” në Gjakovë më 22.09.2023, siç kishte njoftuar ministrja Nagavci. Kurse, më 02.12.2022, ishte raportuar zgjedhja e Zeqir Hashanit si ushtrues detyre i rektorit të këtij Universiteti.
Hashani kishte ardhur në pozitën e ushtruesit të detyrës së rektorit pasi Artan Nimani ishte shkarkuar nga pozita e rektorit të Universitetit të Gjakovës më 21.11.2022. Nimani ishte zgjedhur rektor më 12.07.2019.
Aktualisht, Bunjaku thot se nga muaji tetor 2025 është duke udhëhequr me administratën e Universitetit, ndërsa prorektorja e vetme, Kaltrina Kusari, është në pushim të lehonisë, ndërsa, tre prorektorë të tjerë ai tha se dhanë dorëheqje më 2025 për arsye personale.
/Marrë nga KALLXO.com
