Nxënësja e talentuar Tuana Bajraktaraj nga fshati Jabllanicë e Pejës ka shkëlqyer në Zagreb me interpretimin e saj të fuqishëm në monologu “Dialogu me Loken”, duke përfaqësuar denjësisht shkollën dhe vendin në Festivalin Ndërkombëtar të Teatrit të Fëmijëve në gjuhën shqipe, shkruan AlbanianEducation.net.
Fitnete Ramaj Mujaj, e njohur për stilin e saj poetik të brishtë, të sinqertë dhe plot simbolikë, solli në skenë një krijim që prek rrënjët e kujtesës, marrëdhënien nënë–bijë dhe dialogun e brendshëm që vijon edhe përtej heshtjes. Monologu “Dialogu me Loken” është pjesë e librit të autores Persefonia, një përmbledhje ligjërimesh poetike dhe reflektimesh që ndërthurin dhimbjen, dashurinë dhe forcën e gruas shqiptare.
Në festival, vepra u interpretua me profesionalizëm dhe përkushtim nga nxënësja Tunsa Bajraktari, e cila arriti ta shndërrojë tekstin në një përjetim të gjallë skenik, duke i dhënë zë çdo vargu e çdo emocioni të shkruar nga autorja. Interpretimi u prit me duartrokitje të ngrohta nga publiku i Zagrebit dhe u vlerësua si një nga momentet më të ndjeshme të mbrëmjes.
Fitnete Ramaj Mujaj, përveçse një krijuese e përkushtuar, është edhe mësimdhënëse e inspiruese, e cila çdo ditë punon me nxënësit për t’ua zhvilluar talentin, vetëbesimin dhe dashurinë për artin dhe letërsinë. Prezantimi i monologut në një skenë ndërkombëtare është një dëshmi e qartë e përkushtimit të saj ndaj artit por edhe ndaj edukimit – dy fusha që ajo i ndërthur me pasion dhe profesionalizëm.
Pjesëmarrja në këtë festival e vendos autoren dhe shkollën që ajo përfaqëson në një hartë më të gjerë artistike, duke dëshmuar se krijimtaria dhe talentet nga Kosova jo vetëm konkurrojnë denjësisht, por shkëlqejnë me origjinalitetin e tyre.
Fitnete Ramaj Mujaj, me zërin e saj poetik dhe me angazhimin e saj si mësuese, vazhdon të mbetet një shembull i fuqishëm i gruas krijuese dhe edukatores që i ndërthur fjalët me humanizëm, artin me misionin, dhe skenën me klasën.
Ftesa për të marrë pjesë në këtë festival prestigjioz erdhi nga Shoqata Teatrore Shqiptare në Kroaci “Mërgimtari” dhe nga Këshilli i Mësuesve Shqiptarë në Kroaci, duke vlerësuar punën dhe angazhimin e shkollës në kultivimin e artit te fëmijët.
Pjesëmarrja e Tuanës në Zagreb jo vetëm që solli duartrokitje e emocione, por dëshmoi edhe një herë potencialin e rinisë sonë në artin skenik. Shkolla u shpreh krenare për përfaqësimin dhe suksesin e saj në skenën ndërkombëtare. /AlbanianEducation.net/.
