Ganimete Hyseni prej 30 vjetësh punon si mësimdhënëse e gjuhës shqipe. Në fillimet e saj, ajo ishte përballur menjëherë me vështirësi për shkak të situatës politike që ekzistonte në Kosovë.
Hyseni, e cila tani është mësimdhënëse në shkollën “Hilmi Rakovica” në Prishtinë, e ka përshkruar punën e saj që e nisi në një fshat të vogël të Obiliqit e që nxënësit e parë i kishte të komunitetit serb.
“Dita imë e parë si mësimdhënëse është interesante sepse për herë të parë kam punuar në një fshat të Obiliqit, në Plemetin, atje kam punuar me komunitetin serb. Ka qenë gjenerata e parë që nuk e kanë pranuar gjuhën shqipe si gjuhë të dytë. Ka qenë shumë e vështirë sepse situata në vitin 89 e dimë si ka qenë dhe ka qenë vështirë të zhvillohet mësimi sidomos me një komunitet që nuk e pranonte gjuhën shqipe dhe rrethanat politike ishin shumë të vështira. Në ato rrethana kemi shkuar në vendin e punës”, ka treguar ajo në emisionin “60 Minuta” në KTV.
Hyseni ka thënë se megjithatë arsimi ka qenë i organizuar mirë në vitet 90, edhe pse siç theksoi ajo, nuk ka qenë si sot.
Ajo ka treguar se metodë të mësimit sot e ka që t’i angazhojë më shumë fëmijët të cilët janë më pak të përkushtuar. Ndërsa, ka deklaruar se raporti mes mësimdhënësit dhe nxënësit sot ka ndryshuar.
“Raporti mësimdhënës-nxënës ka ndryshuar, por autoriteti nuk është ulur. Dhuna nuk duhet të përdoret, është mjeti i fundit që duhet të përdoret. Nxënësit duhet të shprehen, jo si në kohën tonë që e kemi adhuruar mësuesit, por sot jemi më të lirë me nxënësit. Komunikimi është përmirësuar, nxënësit janë më të lirshëm, janë më inteligjentë, hulumtojnë, kanë mundësi”.
Infrastrukturën në arsim Hyseni e sheh në nivel të ulët.
“Është për të dëshiruar niveli i infrastrukturës në arsim. Duhet të përmirësohet që nxënësi të ketë mundësi më shumë dhe mësimdhënësi të arrijë rezultate më të mira”.
E përkushtuar në detyrën e saj që e ushtron prej tri dekadash, Hyseni shprehet se e do “shumë arsimin, nxënësit dhe mësimdhënien”.
Vetë tregon se si e nisi këtë udhëtim.
“Vetë e kam zgjedhur. E kam pasur vëllain profesor dhe e kam parë si idol. Gjithmonë s’e kam parë veten në asnjë fushë tjetër, vetëm në fushën e arsimit. Çdo ditë e imja në shkollë, është ditë e gëzueshme”.
Ndërkohë, është shprehur kundër vlerësimit të mësimdhënësve. Sipas saj, vlerësimi tash e nënçmon gjeneratën që vlerësoi mësimdhënësit aktualë.
“Jo që frikësohemi, por atëherë po i nënçmojmë edhe ata që na kanë vlerësuar ne. Jam kundër, sepse po i nënçmojmë. Unë e para do të isha futur në vlerësim, por nuk është e nevojshme”. /KOHA/
