Një ngjarje tronditëse ka ndodhur në një shkollë fillore në Daejeon, Koreja e Jugut, ku një mësuese 40-vjeçare ka goditur me thikë për vdekje një nxënëse 8-vjeçare.
Viktima u gjet me plagë të rënda në katin e dytë të shkollës dhe, pavarësisht përpjekjeve të mjekëve, u shpall e vdekur në spital.
Mësuesja u gjet pranë saj me plagë, të cilat dyshohet se i ka shkaktuar vetes, ndërsa autoritetet po hetojnë rrethanat e ngjarjes.
Presidenti në detyrë i vendit, Choi Sang-mok, ka urdhëruar një hetim të thelluar dhe ka kërkuar masa të reja për të parandaluar raste të ngjashme në të ardhmen.
Sipas raportimeve, mësuesja kishte kërkuar leje gjashtëmujore për shkak të depresionit, por ishte rikthyer në punë pas vetëm 20 ditësh, pasi një mjek e kishte vlerësuar si të aftë për të punuar. Gjatë kësaj periudhe, ajo kishte shfaqur sjellje të dhunshme dhe kishte pasur mendime vetëvrasëse.
Ngjarja ka tronditur komunitetin lokal, ndërsa njerëzit kanë vendosur lule dhe kukulla në portën e shkollës për të nderuar kujtimin e vajzës së vogël.
