Dy grupe të nxënësve në oborrin e shkollës së mesme “Adem Gllavica” në mesditën e të mërkurës kanë nisur përleshje fizike, ndërkohë janë përdorur edhe mjetet e mprehta.
Lëndime mjaftë të rënda nga therja me thikë ka marrë një nxënës i mitur i kësaj shkolle i cili është dërguar menjëherë në emergjencë.
Policia ka bërë të ditur se njëri prej të përfshirëve ka pësuar lëndime dhe është dërguar për trajtim mjekësor.
Kurse një tjetër është arrestuar dhe pas intervistimit është dërguar në mbajtje.
“Një mashkull kosovar (i mitur) ka pësuar lëndime trupore pasi është goditur me thikë gjatë një përleshje që ka ndodhur midis disa personave. Viktima është dërguar për trajtim mjekësor. Lidhur me rastin janë intervistuar disa persona. Në konsultim me prokurorin një i dyshuar kosovar (i mitur) është arrestuar dhe pas intervistimit është dërguar në mbajtje”, thuhet në njoftimin e policisë.
Qendra Klinike e Universitare e Kosovës (QKUK) njoftoi se nxënësi që u ther me thikë të mërkurën është në gjendje të rëndë shëndetësore.
Zëdhënësi i QKUK-së, Shpend Fazliu, i tha KOHËS se ai po trajtohet në Klinikën e Kirurgjisë Abdominale, e është nën mbikëqyrje të ekipeve mjekësore.
“Nxënësi është në gjendje të rëndë. Është pranuar në Kirurgjinë Abdominale. Është në përcjellje njëherë”, tha Fazliu.
