Nxënësit e shkollave 9-vjeçare dhe të mes me janë të ekspozuar ndaj dhunës verbale dhe asaj fizike.
Sipas studimit më të fundit të UNICEF-it, rezulton se të paktën 62% e mësuesve në nëntë qytete të vendit u bërtasin nxënësve.
Veç asaj, në këtë studim vihet re një rritje e raportimit të nxënësve të rasteve të dhunës disiplinore që përdorin mësuesit, si shkulja e veshit, goditja, shtyrja apo pickimi.
STUDIMI
Studimi i UNICEF-it shtrihet në periudhën kohore Dhjetor 2011 – Nëntor 2013 dhe përshin 550 shkolla të rretheve Dibër, Shkodër, Lezhë, Kurbin, Tiranë, Elbasan, Librazhd, Korçë, Vlorë. Kampioni i studimit përbëhet nga rreth 1000 mësues, 1000 anëtarë nga komuniteti dhe 90 mijë nxënës.
Sipas këtij studimi, shqetësuese është se nga raportimi i nxënësve vihet re se ka një rritje të raportimit të nxënësve për përdorimin e dhunës fizike disiplinore nga mësuesit, si shkulje veshi, goditje, shtyrje, pickim. Po ashtu, nivelin më të lartë të raportimit të dhunës e kanë shkollat në zonat urbane, ku 55% e nxënësve raportojnë dhunë, ndërsa në zonat rurale kjo shifër ulet në 46%. 64% e nxënësve në Shkodër dhe Vlorë kanë raportuar dhunë, ndërsa nivel më të ulët raportimi ka pasur në Librazhd, vetëm 37% e nxënësve kanë raportuar forma të dhunës disiplinore.
Mësuesit gjithashtu, raportojnë nivel të lartë të përdorimit të dhunës fizike dhe verbale ndaj nxënësve të tyre. Sidomos mësuesit meshkuj e konsiderojnë si “normale” trajtimin e dhunshëm të nxënësve të tyre. Sipas studimit, Korça dhe Librazhdi raportojnë nivelin më të ulët mesatar të përdorimit të dhunës, ndërkohë që mësuesit e Lezhës, Vlorës dhe Tiranës raportojnë nivel më të lartë.
