Pauzën prej ligjëratave e shfrytëzon ndryshe nga kolegët e saj.
Vesa Galica, 20-vjeçare dhe studente në degën e Inxhinierisë Kompjuterike, kohën e lirë e plotëson me punën me grep.
Këtë zanat nuk ia mësoi gjyshja as nëna e dikush tjetër më në moshë.
Vesa, që nga klasa e 8-të filloi të interesohet vetë për ta mësuar punën me grep me anë të videove në internet.
“Nuk mund ta paramendoj veten duke mos punuar me grep”, thotë ajo derisa punimet e saj tashmë po pëlqehen shumë.
Për herë të parë punoi rroba për kukulla, e tash në listën e gjërave që i thur janë çantat, rroba të zakonshme e për plazh dhe kapelat e ndryshme.
Ngjyrat dhe natyra, e dërgojnë Vesën në imagjinatë të cilën e kthen në art për dizajnet e saj të reja.
Por që natyrisht, shpesh herë përmbush edhe kërkesat e klientëve.
Shumë shpejt thotë se e ka kuptuar edhe rëndësinë e marketingut. Andaj rrjetet sociale i shfrytëzon në mënyrën më të mirë të mundshme ku ndodh të bëhet edhe virale.
Mbështetjen më të madhe e ka nga familja e shoqëria, që shpesh herë janë ndër të parët që porosisin gjëra prej saj.
Me këshillat e sugjerimet që ata i japin, 20-vjeçarja avancohet përditë e më tepër në këtë punë që mbi të gjitha i sjell edhe kënaqësi.
Edhe pse me profesion do të jetë inxhiniere e kompjuterikes, “YarnyHandmade”, është marka e saj të cilën synim e ka që ta zhvillojë më tutje.
