Statuti i ri i UP-së: Një prej pikave, ndalimi i praktikave të nepotizmit në punësim

Pas finalizimit të punës në Grupin Punues dhe votimit të tij në Këshillin Drejtues, sot edhe Senati i UP-së ka votuar statutin e ri, per t’i hapur udhë miratimit të tij në Kuvend.

Ky draft-statut përmban një mori vendimesh e reformash që do të ndikojnë direkt në përmirësimin e cilësisë dhe punës në Universitet duke shënuar ngritje substanciale të standardeve të funksionimit si institucion dhe avancim të standardeve akademike.

Statuti i ri ndër të tjera parasheh:

Një funksionim më të decentralizuar të universitetit, duke bartur e saktësuar përgjegjësitë dhe llogaridhënien menaxheriale drejt rektorit dhe dekanëve.

Përcakton rregulla që avancojnë aspiratat për barazi gjinore.

Kritere të qarta për zgjedhje në pozita drejtuese dhe ndalesa për periudha të konsiderueshme kohore për personat të cilët ushtrojnë ose kanë ushtruar funksione të larta partiake apo politike.

Kritere te qarta dhe të avancuara për zgedhjen e Rektorit.

Kritere më të qarta e të larta për zgjedhjen e anëtarëve të Këshillit Drejtues;

Standarde dukshëm më të larta akademike për zgjedhjen dhe avancimin e personelit akademik që do të përbëjë standard të ri në sektorin e arsimit të lartë;

Ndalimi i praktikave të nepotizmit në punësim si personel akademik në nivel fakulteti;

Avokon një frymë të re të vlerësimit të vazhdueshëm të punës së studentëve dhe reflekton kërkesën për një identitet më të zgjeruar profesional të personelit akademik ku detyrat e punës shkojnë përtej mësimdhënies dhe përtej synimeve personale.

Sistem i ri i menaxhimit të performancës së personelit akademik dhe ngritje e rolit të studentëve në dimensionin akademik;

Krijon bazë të konsoliduar rregullative për institute dhe qendra hulumtuese funksionale (në nivel universiteti apo njësishë akademike) duke ndjekur modelet e universiteteve më të mira botërore.

Krijimi i parakushteve për zhvillimin e shkencës duke përfshirë edhe funksionalizimin e Instituteve kërkimore, zhvillimin e studimeve pasdoktortale dhe punësimin e hulumtuesve si kategori e re e personelit akademik;

Universiteti reflekton qartë koherencën me politikat dhe parimet e ENQA-s për sigurimin e brendshëm të cilësisë ndërsa parashihen edhe politika të reja për vlerësim dhe menaxhim të performancës së personelit akademik.

Fuqizon të drejtat e studentëve dhe mekanizmat shtesë për realizimin e tyre si p.sh.: krijimi i institucionit të Ombudspersonit.

Parasheh standarde më rigoroze, më të sakta dhe qartazi proporcionale për marrjen e thirrjes së parë të profesorit (zgjedhja në profesor asistent) dhe në marrjen e thirrjes së fundit (profesor i rregullt).

Me statutin e ri fillimisht Universiteti i Prishtinës dhe pastaj edhe Universitetet tjera në Republikën e Kosovës, do të vendosin përfundimisht standarde të tilla që i janë dashur vendit në mënyrë që të rritet cilësia e studimeve, të definohen qartë rregullat, të përmirësohet produktiviteti shkencor, të rritet cilësia e publikimeve shkencore dhe në këtë mënyrë të përmirësohet gjendja në arsim e kështu Universitetet tona të rangohen aty ku duhet në nivel rajoni dhe më gjerë.

Si ministre e arsimit, falenderoj secilin e secilën që kanë kontribuar në këtë draft statut, të gjithë ata e ato që po angazhohen për avancimin e performancës së UP-së. Do të vazhdoj të jap përkrahjen e plotë në të gjitha format dhe mundësitë, dhe do të mbështes pa kompromis avancimin e cilësisë në arsimin e lartë.