“Në janar do të vendoset vlera e koeficientit. Nuk mund ta përcaktojmë koeficientin me Ligjin e Pagave, por me buxhet. Po kërkoj pak durim prej juve, saktësisht në janar të vitit 2023”. Kështu deklaroi kryeministri Albin Kurti më 24 dhjetor.
Për ta mbajtur këtë premtim Kurti ka afat veç edhe sot, pasi është dita e fundit e muajit janar, ndërsa koeficienti i Ligjit të Pagave vazhdon të mbahet i fshehtë.
Ligji për Paga hyn në fuqi më 5 shkurt. Me të rregullohet çështja e pagave për punonjësit e sektorit publik. Koeficientet tashmë janë publikuar, por se vlera ka mbetur e fshehtë.
Ministri i Financave, Hekuran Murati, ditë më parë u shpreh se janë duke u bërë përllogaritjet dhe kur të bëhet përmbledhja e të gjithave, atëherë do të përpjesëtohet shuma e ndarë për paga në buxhet.
Ligji i Pagave mund të dërgohet në Kushtetuese
Dy institucione deri tash, kanë paraqitur kërkesë të Avokati i Popullit, për t’a referuar ligjin, në Gjykatë Kushtetuese, çka do të thoshte se, ligji do të pezullohej, deri në një vendim të gjykatës.
Ato janë Këshilli Prokurorial e Instituti i Kosovës për Drejtësi, që konsiderojnë se në Ligjin e shumë përfolur, ka shkelje kushtetuese.
Ndërsa partia Aleanca për Ardhmërinë e Kosovës ka paralajmëruar se do ta dërgojë Ligjin në Kushtetuese nëse vlera e koeficientit është nën 129 euro. (Albanian Education)
Ligji i Pagave hyn në fuqi edhe 6 ditë: A do të dërgohet në Kushtetuese?
