Ndonëse lufta ka përfunduar qe 26 vjet, shkollat publike në Prishtinë ende po përballen me mungesa të theksuara të pajisjeve elementare.
Andaj kjo situatë, sipas Kryetarit të Këshillit të Prindërve të shkollave të Prishtinës, Nexhmi Hoxha, ka detyruar prindërit që vullnetarisht të kontribuojnë financiarisht për nevojat e shkollave publike, raporton Kiks Kosova.
Sipas Hoxhës, zgjidhja duhet bërë në atë mënyrë që të rritet buxheti i ndarë për arsim e po ashtu edhe të bëhet një projekt që do mundësonte që shkollat të jenë me vetëfinancim.
E kësisoj, sipas kryetarit do të mbuloheshin nevojat që në fakt janë kompetencë e komunës.
Disa shkolla janë tërësisht të pajisura, ndërsa ka të tjera që kanë mungesa, andaj kjo së pari duhet rregulluar, sipas kryetarit, ngase nuk është e drejtë.
Kontributi financiar nga prindërit për shkollat, sipas Hoxhës, ndonëse është i lejuar ligjërisht, prapëseprapë është përgjegjësi e institucioneve lokale.
Andaj as ankesat që shkuan në adresë të tij nuk munguan, por që zgjidhjet duken të jenë problematike.
Kryetari Hoxha tha për Kiks Kosovën që përveç perdeve e klimave, shkollat e Prishtinës përballen edhe me mungesa tjera edhe më thelbësore.
Kërkesa e Këshillit të Prindërve të shkollave publike në kryeqytet është që në vitin e ardhshëm, pushteti lokal të ketë prioritet arsimin ngase gjendja nuk është aspak mirë. /Klankosova.tv
