Intervistoi: Arta Gashi
Është vetëm 13 vjeçar, por qysh tani ka rrëmbyer disa çmime. Karrierën si muzikant e nisi qysh në moshën 6-vjeçare në qytetin e lindjes në Berat të Shqipërisë, ndërsa tani shkon në shkollë të muzikës ku të ardhmen e sheh si një muzicient/këngëtar. Fjala është për Sildi Hajrullaj, i cili në një interivstë për “Kids of Kosova” (www.kidsofkosova.net) flet për karrierën e tij të deritanishme, por jo vetëm.
Kids of Kosova: Sa vjeçar jeni, në cilën klasë dhe në cilë shkollë vijoni mësimet?
Sildi Hajrullaj: Unë jam Sildi Hajrullaj, 13 vjeçar në klasën e tetë të shkollës artistike “Ajet Xhindole”, në Berat.
Kids of Kosova: Jeni një këngëtar i njohur i muzikës për fëmijë? Në cilën moshë keni filluar të merreni me muzikë?
Sildi Hajrullaj: Kam filluar shumë herë të merrem me muzikë. Në moshën 6 vjeçare jam prezantuar në festivalin e këngëve për fëmijë në Berat, për të vazhduar me shumë aktivitete të tjera muzikore brenda dhe jashtë Shqipërisë.
Kids of Kosova: Cilat janë deri tani sukseset tuaja? Çfarë çmime keni fituar?
Sildi Hajrullaj: Kam qenë gjithmonë i vlerësuar me çmime. Çmimin e parë që kam fituar ka qenë ‘Interpretuesi më i vogël i festivalit’, çmimi 1,2,3 gjithashtu, kam qenë pjesëmarrës në “The Voice Kids” , dhe së fundmi jam vlerësuar me vendin e 4-të në Festivalin e Maltës midis shumë shteteve konkurruese.
Përveç muzikës së lehtë preferenca ime është edhe për muzikën popullore, ku para disa vitesh në konkursin e muzikës popullore qytetare e zhvilluar në qytetin e Tiranës, jam vlerësuar me certifikatë nga artistja e njohur Margarita Xhepa.
Kids of Kosova: Cilat janë planet tuaja?
Sildi Hajrullaj: Sikurse e përmenda dhe më sipër, unë studioj në shkollën e muzikës për kitarë, dhe planet e mia në të ardhmen janë drejt muzikës.
Kids of Kosova: Për fund, mesazhi juaj për bashkëmoshatarët tuaja?
Sildi Hajrullaj: Mesazhi im për bashkëmoshatarët është që nëse kanë një pasion, të punojnë fort për të arritur suksesin. (KidsofKosova)
