Drejtori i Arsimit në Rahovec, Avni Morina, duke ndërlidhur situatën me mungesën e librave, është kthyer në kohë dhe ka treguar një ngjarje që i kishte ndodhur kur ishte në vitin e parë të shkollësë mesme.
Drejtori Morina ka treguar se si në fillim të vitit shkollor 1988/89, profesori i fizikës i asaj kohe i kishte vënë notën 1 në ditar, në rubrikën e notave, që në javën e parë të shtatorit, kjo për shkak se nuk kishte mundësi t’i blinte të gjitha librat, e që në këtë rast as librin e fizikës.
Ai tregon se si ishte i përkushtuar në mësime ku udhëtonte çdo ditë 20 kilometra dhe nuk mungonte asnjëherë dhe në fund të gjysmëvjetorit të parë mezi kishte arritur që notën e dobët në Fizikë ta përmirësojë në notën 3, shkruan AlbanianEducation.net.
Drejtori Morina uron që nxënësit e sotëm të mos ndëshkohen që në javën e parë të shtatorit nga mësimdhënësit e tyre, për shkak të mungesës së librave!
Postimi i tij i plotë:
RETROSPEKTIVË
Njëherë e në një kohë, konkretisht në fillim të vitit shkollor 1988/89, atëherë kur unë isha nxënës i vitit të parë të shkollës së mesme, profesori i fizikës i asaj kohe më pati vënë notën 1 në ditar, në rubrikën e notave, që në javën e parë të shtatorit.
Arsyeja ishte e thjeshtë. Familja ime, në fukarallëkun e asaj kohe nuk kishte para për të m’i blerë të gjithë librat, e po ashtu edhe librin e fizikës, për mungesën e të cilit unë si nxënës u ndëshkova, edhe pse isha i përkushtuar të mësoj sa më shumë.
Udhëtoja çdo ditë në këmbë nga 20 km rrugë (Relacioni Vrajakë – Nashpallë- Pataqan i Epërm – Rahovec) për të mos munguar asnjë ditë në shkollë, në mënyrë që të isha i rregullt në mësime.
Muajt kalonin dhe unë e di se ç’kam hequr derisa atë notë të dobët e përmirësova nga nota e dobët 1, në notën e mirë 3, në fund të gjysmëvjetorit të parë.
Ndërkohë, në muajt pasues u pajisa disi me librat dhe vazhdoja të mësoja shumë e më shumë dhe si rezultat i atij angazhimi, të gjitha notat e mia (edhe nota e lëndës së fizikës) në fund të vitit shkollor ishin nota të shkëlqyeshme.
Sot, pas shumë vitesh më shumë se asnjëherë më parë më vajti mendja tek ajo notë e dobët, të cilën e pata marrë në javën e parë të shtatorit për shkak se nuk kisha libër të fizikës.
Sot, kur unë jam me gradë shkencore në fushën e fizikës, e kujtoj me mall atë notë të dobët në lëndën e fizikës.
P.s: Uroj që nxënësit e sotëm të mos ndëshkohen që në javën e parë të shtatorit nga mësimdhënësit e tyre, për shkak të mungesës së librave!
