“Fustani i verës” është kthyer në një traditë globale të përvitshme. Me gjithë çfarë po i ndodh botës, u duk sikur s’do të kishte një “The Dress” këtë vit, por ja që ndodhi e kundërta!
Jo vetëm që ka, por rastis që fustani më i famshëm i kësaj vere të jetë dizenjuar nga stilistja shqiptare Lirika Matoshi!
“Fustani me luleshtrydhe”, një krijim i stilistes nga Prishtina mund të vishet nga Hirushja e përrallës, një vogëlushe, një Vip apo nga ty, përgjatë gjithë vitit! Me siguri nuk është hera e parë që shihni këtë fustan, pasi Instagram-i, Tik Tok, Twitter-i, e kanë bërë jo më kot viral gjatë periudhës së pandemisë.
Me jakë në formë V-je, fustani rozë në ngjyrë rozë të lehtë me detajet e luleshtrydheve mori famën që me siguri stilistja shqiptare se kishte menduar se do të merrte. Nëse s’ju ka rastisur të dëgjoni emrin e saj, po jua kujtojmë ne. Lirika Matoshi është një vajzë me origjinë nga Prishtina, e cila shkoi për studime në “Fashion Institute of Technology” në New York pa menduar se krijimet e saj do të ktheheshin në sensacionin e Instagram-it dhe se një ditë, Vogue do të shkruante për të.
Ka diçka tek ky dizajn që i ka fiksuar njerëzit. Disa mendojnë se të bën të ndihesh si një “princeshë Disney”, ndërsa të tjerë shprehehn se “i ndryshon humori kur e veshin”.
Para “fustanit të luleshtrydheve”, stilistja Matoshi u bë e famshme për krijimet e veçantë që bënte me getat, gjë e cila rezultoi në sukses të menjëhershëm dhe bashkëpunim me emra të famshëm si Dua Lipa, Rita Ora, Kesha, e shumë të tjerë.
Burimi: Vogue
