Dita-ditës po bëhet më shqetësuese rritja e numrit të të miturve që konsumojnë cigare elektronike.
Madje, ka raste kur nxënësit e ciklit të ulët, ato i kanë ndezur edhe brenda objektit të shkollës.
RTK ka biseduar me disa prej përdoruesve të tyre, të cilët tregojnë se me lehtësi i blejnë ato, duke rrëfyer se në secilën paralele ka konsumues të tyre.
Një nxënës me të cilin bashkëbisedoi RTK, indentiteti i të cilit për arsye privatësie është fshehur, thotë se ishte vetëm 12 vjeç kur ka filluar përdorimin e cigareve me avull, të ashtuquajtura VAPE. Ai thotë se tashmë janë bërë 2 vjet prej se ka kaluar në përdorues të rregullt, derisa prindërit nuk janë në dijeni për këtë veprim të tij.
Përdorimi i këtyre lloj cigareve dhe të ngjashme me to tjera, ka marrë përmasa të gjera të përdorimit jo vetëm nga të rriturit por edhe nga vetë fëmijët.
Ato konsumohen madje edhe nëpër shkolla.
Nxënësit thonë se në çdo paralele ka përdorues të “Vape”. Këtë fakt e pohon edhe drejtoresha e shkollës Mimoza Krasniqi.
“Mbi 10 raste janë, 2 -3 raste kanë ndodhur brenda shkollës, brenda klasës e që rastësisht kur ka hy arsimtare në orë dhe e ka vërejt derisa ka fillu ora në mes ndërrimi, ndërkaq dy, tre raste të tjera janë rreth shkollës, afër lokaleve”, ka thënë Krasniqi.
Për këtë dukuri, nga Këshilli i Prindërve të Kosovës, thonë se vazhdimisht marrin ankesa.
Enver Balaj, sekretar i Këshillit i Prindërve të Kosovës ka apeluar që institucionet dhe organet kompetente të ndërmarrin masa tek pikat mobile shitëse të parandalojmë shitjen e tyre në afërsi të shkollave.
“Cigarja elektronike është një dukuri në rritje dhe ka shumë pika mobile dhe afër shkollave e të cilat nuk kontrollohen nga askush, e as nuk i inspekton askush për me ndalu këtë dukuri që shumica e nxënësve pijnë në ambiente të mbyllura. Kisha apeluar tek institucionet dhe organet kompetente të ndërmarrin masa tek pikat mobile shitëse të parandalojmë shitjen e tyre në afërsi të shkollave”, tha ai.
Ndërsa profesionistët shëndetësorë ngrenë alarm për rrezik nga përdorimi i këtyre produkteve te moshat e reja.
“Janë plot substanca kimike që është vërtetuar që bëjnë dëme në sistemin respirator në rrugët e frymëmarrjes si në përkeqësimin e sëmundjeve kronike, asma, bronhitet dhe sëmundjet e rrugëve të frymëmarrjes në shkaktimin e sëmundjeve prej fillimit, sëmundjet të cilat nuk i ka pasur më herët e deri te potencialisht rritjes së mundësisë së sëmundjeve serioze siç është edhe sëmundjet e kancerit të mushkërive”, ka thënë Besim Morina, pulmolog.
Nga Ministria e Shëndetësisë, përmes një përgjigje me shkrim për RTK-në kanë theksuar se çështja e tyre do të adresohet në mënyrë më specifike në Ligjin për duhanin, i cili është në procedura të plotësim-ndryshimit për t’i trajtuar edhe këto produkte dhe të tjera që kanë të bëjnë me duhanin.
