Në disa shkolla të Edinburgut, nxënësit dorëzojnë telefonat në çanta speciale Yondr, që mbyllen magnetikisht dhe nuk hapen deri në fund të mësimit. Kjo nismë synon të rrisë përqendrimin dhe është mbështetur nga shumica e prindërve dhe mësuesve.
Pse kjo masë?
Vendimi u mor pas ankesave të shumta nga mësuesit, të cilët raportuan se telefonat po bëhen burim shpërqendrimi serioz gjatë orëve. Sipas një sondazhi nga Shoqata e Mësuesve të Shkollave të Mesme në Skoci (SSTA), 92% e mësuesve thanë se orët e tyre janë ndërprerë nga përdorimi i celularëve. Ndër shqetësimet më të shpeshta ishin:
- Dërgimi i mesazheve gjatë orës
- Fotografimi i mësuesve dhe nxënësve pa leje
- Përdorimi i rrjeteve sociale për bullizëm
- Regjistrimi i fshehtë i orëve mësimore
Mbështetje nga komuniteti
Masa është pritur pozitivisht nga prindërit. Në një sondazh të zhvilluar në Portobello High School, 86% e prindërve u shprehën pro kufizimit të telefonave në ambientet shkollore. Ata theksuan se mungesa e telefonit ndihmon fëmijët të përqendrohen më shumë dhe të ndërveprojnë më mirë me njëri-tjetrin.
Një model që mund të ndiqet gjerësisht
Kjo nismë është parë si një shembull i mirë për shkolla të tjera në Skoci dhe më gjerë. Zyrtarë të arsimit në Edinburg kanë deklaruar se nëse rezultatet vazhdojnë të jenë pozitive, politika e dorëzimit të telefonave mund të shtrihet në të gjithë vendin.
Marrë nga Portali Shkollor
