Shkolla fillore “Vaso Pashë Shkodrani” në Pejë ka publikuar një njoftim drejtuar prindërve, duke theksuar rëndësinë e bashkëpunimit të vazhdueshëm ndërmjet familjes dhe shkollës në arritjen e rezultateve më të mira në mësim, shkruan AlbanianEducation.net.
Në mesazhin e saj, drejtoria e shkollës nënvizon se përkrahja aktive e prindërve është thelbësore për zhvillimin akademik dhe personal të fëmijëve, duke i ftuar ata të angazhohen më shumë në procesin edukativo-arsimor dhe në aktivitetet shkollore.
Njoftimi nga shkolla:
PRINDËR TË NDERUAR,
Fëmijët e suksesshëm në shkollë janë më të përgatitur për jetë. Që fëmijët tuaj të arrijnë sukses në mësim, ata kanë nevojë për përkrahjen dhe bashkëpunimin tuaj të vazhdueshëm.
Roli i prindërve në procesin mësimor:
Prindërit kanë një rol të rëndësishëm në mbështetjen e fëmijëve të tyre.
Për këtë arsye, është e nevojshme që ata:
• Të sigurojnë frekuentim të rregullt të shkollës nga fëmijët;
• Të kontribuojnë në organizimin e aktiviteteve shkollë–prindër–nxënës;
• Të njihen me programin mësimor dhe përmbajtjen që mësojnë fëmijët;
• Të kuptojnë funksionimin e sistemit arsimor në Kosovë;
• Të informohen për mundësitë që kanë për të ndihmuar fëmijën e tyre;
• Të njohin të drejtat dhe përgjegjësitë e tyre si prindër;
• Të jenë të vetëdijshëm për pritshmëritë e mësuesve ndaj nxënësve;
• Të njohin format dhe mënyrat e bashkëpunimit që ofron shkolla;
• Të ndihmojnë mësuesit për ta njohur më mirë fëmijën;
• Të bashkëpunojnë me mësuesit për të kuptuar më mirë pritshmëritë reciproke.
Format e bashkëpunimit shkollë–prindër:
Shkolla ofron forma të ndryshme bashkëpunimi për të forcuar komunikimin dhe përfshirjen e prindërve:
1. Vizita paraprake të prindërve në shkollë;
2. Takime orientuese;
3. Takime të shkurtra sipas orarit të caktuar;
4. Komunikim përmes thirrjeve telefonike;
5. Takime individuale prindër–mësues;
6. Letrat informuese;
7. Manuali i shkollës;
8. Tabela e njoftimeve;
9. Kutia e sugjerimeve;
10. Mbledhjet me prindër;
11. Aktivitetet jashtëmësimore të nxënësve;
12. Komunikimi përmes adresës elektronike të shkollës.
Bashkëpunimi i ngushtë ndërmjet shkollës dhe prindërve është çelësi i suksesit të nxënësve.
Ju falënderojmë për mirëkuptimin dhe bashkëpunimin tuaj!
Me respekt,
Drejtoresha e shkollës:
Syndyze Loxha
Shkolla Fillore dhe e Mesme e Ulët
“Vaso Pashë Shkodrani” – Pejë
