Ndonëse kanë kaluar dhjetë ditë nga raportimi i KALLXO.com për dëmtimin e dritareve të Shkollës Fillore të Mesme të Ulët “Fetah Qerimi” në fshatin Zhegoc të Gjilanit gjendja është e njëjtë.
Sipas Shpend Nuhiut, drejtorit të Arsimit në Gjilan, nxënësit e kësaj shkolle po vazhdojnë mësimin në shkollën amë në Vërbicë të Zhegocit.
“Nuk kemi marrë diçka ndonjë raport të Policisë. Shkolla është aty, është ashtu me xhama të thyer. Fëmijët janë duke mësu atje, janë duke i bartë me kontratë të transportit, në Vërbicë të Zhegocit” – tha Nuhiu më 17.10.2025.
Valon Osmani, zëdhënësi i Policisë për rajonin e Gjilanit, tha se po vazhdon mbledhja e provave për këtë rast.
“Lidhur me rastin e dëmtimit të xhamave të Shkollës së fshatit Zhegoc, i cili ka ndodhur më 06.10.2025, Njësiti i hetimeve i Stacionit policor në Gjilan në koordinim me Prokurorinë e Shtetit është duke ndërmarrë veprime të mëtejme hetimore në mbledhjen e provave materiale, me qëllim të ndriçimit të plotë të rastit” – ka thënë Osmani.
Ekipi i KALLXO.com e vizitoi më 07.10.2025 Shkollën “Fetah Qerimi” dhe pa dritaret e thyera e copëza të xhamit përreth objektit.
/Marrë nga KALLXO.com
