Pa mësimdhënës të lëndës së kimisë kanë mbetur tash e dy muaj nxënësit në fshatin Vërmicë të Malishevës.
Kjo shkollë përpos kuadrit për lëndën e kimisë, kanë mungesë edhe të mësimdhënësve në lëndën e TIK-ut dhe të ciklit fillor. Dy nga ta kanë marrë pushim pa pagesë, ndërsa tjetri është pensionuar. Nxënësit kanë thënë se kjo situatë do t’i pengojë ata në nxënien e njohurive.
Bëhen dy muaj që nxënësit në shkollën “12 Prilli” në fshati Vërmicë të Malishevës nuk kanë mbajtur lëndën e kimisë. Ata nuk janë duke e mbajtur as lëndën e Teknologjisë së Informacionit dhe Komunikimit, meqë dy mësimdhënësit kanë marrë pushim pa pagesë.
Mungesa e arsimtarëve ka ngritur shqetësime te nxënësit.
“Kemi mbetur me mësime mbrapa. Kimia është shumë e rëndësishme pasi ka lidhje me lëndë tjera duhet të mësojmë më shumë për kiminë. Çka nëse në të ardhmen dëshirojmë të ndjekim gjimnazin shkencor”, ka thënë nxënësja Mirvete Gashi.
Edhe Elmedina Gashi, nxënëse e klasës së shtatë, ka shprehur të njëjtin shqetësim.
“Nëse nuk e mbajmë kiminë mundet me na pengu në të ardhmen tonë, për shembull kur të shkojmë në një shkollë tjetër nuk do të dimë asgjë”, ka thënë ajo.
Drejtoresha e shkollës, Mendushe Gashi, ka thënë se mësimdhënësja e fizikës është e angazhuar në mbajtjen e orëve në lëndën e kimisë.
“Te klasa shtatë e kemi përzgjedhur mësimdhënësen e fizikës, pasi e ka të përfunduar fizikë-kimi, i mban dy orët e klasës së shtatë. Ndërsa e teta dhe e nënta janë pak më mbrapa, por kemi kërkuar një mësimdhënës që është adekuat për kimi, pasi lënda e kimisë është pak ma e komplikuar sepse njohuritë janë të gjitha teorike e praktikë nuk ka asgjë”, ka thënë ajo.
Edhe nxënësit e klasës së katër tash e dy muaj janë pa mësues, meqë mësimdhënësi i tyre ka dalë në pension. E orët e tij është duke i mbajtur mësimdhënësja e klasës së tretë.
“Mësimdhënësja është duke i mbajtur orët e plota – prej orës 8 deri 10:30 i mban me klasën e tretë, e prej 10:30 deri në 12:30 që ndodhë deri në ora 13:00 i mban me klasën e katër për t’i kompensuar orët që nxënësit të mos mbesin pa njohuri”, ka thënë drejtoresha.
Në Drejtori të Arsimit kanë thënë se procesi për rekrutimin e mësimdhënësit për klasën e katër është afër përfundimit. E për arsimtarët e lëndës së kimisë dhe të TIK-ut theksuan se do t’i angazhojnë mësimdhënësit që nuk kanë normën e plotë të orëve mësimore.
Hapjen e konkursit të ri për këto pozita në DKA kanë thënë se e kanë të pamundur, meqë priten të kthehen mësimdhënësit nga pushimi pa pagesë.
KOHA ka raportuar edhe më herët që mësimdhënësit janë duke shfrytëzuar pushimin 1-vjeçar pa pagesë, për të shkuar jashtë vendit. Ligji i Punës ua mundëson që të punësuarit të marrin një vit pushim pa pagesë dhe pas asaj periudhe të kthehen në vendin e punës. Kërkesa për pushim pa pagesë aprovohet nga drejtoritë komunale të arsimit, kur mësimdhënësit i nevojitet për çështje mjekësore apo për ngritje profesionale.
Në Sindikatën e Bashkuar të Arsimit, Shkencës dhe Kulturës (SBASHK) patën deklaruar se largimi i mësimdhënësve jashtë vendit është shndërruar në fenomen.
Nga njohësit e arsimit shfrytëzimi i pushimit pa pagesë për arsye që nuk lidhen me shëndetin dhe ngritjes së tyre akademike, është vlerësuar si keqshfrytëzim për të ruajtur vendin e punës. / KOHA
