Shkolla “Mustafa Bakiu”, në Prizren ka mbajtur mbledhjen e Këshillit të Arsimtarëve nën kryesimin e drejtoreshës Behare Kryeziu, ku u tha se suksesi gjatë gjysmëvjetorit të parë ka qenë i kënaqshëm me notë mesatare 4.03, shkruan AlbanianEducation.net.
Njoftimi i shkollës:
NGA MBLEDHJA E KËSHILLIT TË ARSIMTARËVE
Nën kryesimin e drejtoreshës së shkollës sonë, znj.Behare Kryeziu, u mbajt mbledhja e Këshillit të arsimtarëve të ciklit të lartë.
Drejtoresha së pari përshëndeti të pranishmit e pastaj i njoftoi me rendin e ditës.
Fillimisht u tha se suksesi gjatë gjysmëvjetorit të parë ka qenë i kënaqshëm me notë mesatare 4.03. Ndërkohë u diskutua edhe për disa nxënës të vlerësuar me nota të dobëta, duke kërkuar angazhim edhe më shumë për përmirësimin e suksesit tek ata nxënës.
Po ashtu u tha se katër nxënës, për shkak të mosvijueshmërisë së mësimit, kanë mbetur të panotuar.
Temë diskutimi ishin edhe mungesat sidomos pa arsye të nxënësve e në veçanti për nxënësit që mungojnë rregullisht në orët e para. Për këtë u kërkua bashkëpunim edhe më i ngushtë me prindërit e fëmijëve dhe me psikologen e shkollës.
Gjatë gjysmëvjetorit të parë pati mungesa edhe të mësimdhënësve, e për këtë drejtoresha kërkoi që orët e humbura të zëvendësohen dhe ato të plotësohen e të shënohen në vendin e veçantë në ditar në bashkëpunim me kujdestarët e klasave.
Gjithashtu kujdestatët paraqitën vërejtjet e disa prindërve në mbledhje të prindërve, sidomos për ata mësimdhënës që kanë notuar me nota të pamjaftueshme.
Në fund të gjithë shprehën besimin dhe bindjen se në gjysmëvjetorin e dytë angazhimi do të jetë edhe i madh si nga ana e mësimdhënësve e poashtu edhe nga ana nxënësve.
