Emira Krusha, mësimdhënëse e TIK-ut në shkollën fillore “Emin Duraku” në Prizren përmes një mesazhi ka falënderuar drejtorin e kësaj shkolle Rrahim Bekteshi për mbështetjen.
Ajo ka shprehur gëzimin pasi shkolla ka bërë një postim për ditëlindjen e saj të 28-të, duke thënë se ka qenë një nga dhuratat më të mira, shkruan AlbanianEducation.net.
Postimi i mësueses Ermira:
I nderuari drejtor,
Dje mbusha plot 28 vjet. Kam marrë dhurata në çdo ditëlindje si çdokush. Disa më kujtohen, por shumica po harrohen me kalimin e viteve.
Falë jush, dje arrita ta marrë dhuratën më të vlefshme, më të ngrohtë dhe më motivuese gjerë më tani.
Momentin kur lexova postimin për ditëlindje në faqe të shkollës, nuk mund ta përshkruaj me fjalë.
Ende pa i mbush 1 vjet me përvojë pune, marrja e një urimi të tillë nga ju e nga shkolla, është një krenari e madhe për mua.
Drejtor,
Ndoshta ju kujtohet, që në ditën e parë kur u paraqita në shkollë, ju ritheksova që ju ishit arsyeja se pse unë e zgjodha këtë shkollë, edhe pse pata rast të zgjedhi 3 shkolla të ndryshme.
Unë nuk ju njihja juve si person , por vetëm dëgjoja sukseset tuaja dhe ndryshimet që i realizonit në shkollë.
Përveç këtyre, ju gjithashtu më keni mbështetur tej mase gjatë përfundimit të praktikës pedagogjike.
Tani, me kalimin e kohës po ju njoh edhe më tepër juve dhe po e dëshmoj çdo ditë e më shumë se ndoshta kam marrë vendimin më të qëlluar të jetës duke e zgjedhur këtë shkollë.
Të punësohesh, sidomos të punësohesh në institucione shtetërore është fat i madh. Por në qoftë se nuk ke drejtues që të vlerësojnë dhe kolegë që bashkëpunojnë atëherë as puna e bërë e as rroga e marrë nuk do të kenë aspak vlerë.
Fatmirësisht unë i zotëroj që të dy, edhe drejtues që më vlerësojnë, motivojnë e më avancojnë, por edhe kolegë që bashkëpunojnë.
Jam dhe do të jem gjithmonë në shërbim të juajin dhe të shkollës drejtor, me gjithë fuqinë që kam.
Padyshim se do të vazhdojmë ta bëjmë edhe më tutje shkollën tonë storie suksesi!
Respekt i pafund!
Mësimdhënësia e TIK-ut :
Ermira Krusha
