Në kuadër të aktiviteteve të nëntorit dhe në nder të festës së 28 Nëntorit – Ditës së Flamurit, nxënësit e shkollës “Esad Mekuli” – Caravik të Klinës zhvilluan një vizitë mësimore me karakter historik dhe kulturor në disa prej vendeve më të rëndësishme të trashëgimisë sonë kombëtare.
Gjatë vizitës në Muzeun Etnologjik të Deçanit, nxënësit patën mundësinë të njihen nga afër me objekte të vjetra, vegla pune, veshje tradicionale dhe elemente të kulturës sonë popullore. Ekspozita u mundësoi atyre të kuptojnë më thellë mënyrën e jetesës së brezave të kaluar dhe vlerat që përbëjnë identitetin tonë kombëtar.
Vizita vazhdoi në Kullat tradicionale të Gllogjanit dhe Varrezat e Dëshmorëve, ku nxënësit reflektuan mbi historinë e lavdishme të zonës dhe sakrificën e atyre që dhanë jetën për liri e pavarësi. Ky ishte një moment i rëndësishëm edukativ që u ngjalli atyre ndjenjën e respektit, mirënjohjes dhe lidhjes me historinë kombëtare.
Këto aktivitete synojnë të pasurojnë njohuritë historike të nxënësve, duke forcuar njëkohësisht ndjenjën e identitetit dhe vlerësimit për rrënjët tona.
Shkolla “Esad Mekuli” – Caravik i Poshtë falënderon mësimdhënësit, prindërit dhe të gjithë kontribuuesit për mbështetjen dhe bashkëpunimin e vazhdueshëm.
