Syri i Vizionit në kuadër të programit SEED faza III, ka mbështetur pjesëmarrjen e tri shkollave nga Kosova, SHME “Ali Hadri” Pejë, SHME “Kadri Kuari” Gjakovë dhe SHME “Ymer Prizreni” nga Prizreni, në garën më të madhe në Evropë, të shkollave profesionale të hotelerisë dhe turizmit.
Nga data 17 deri 22 tetor 2022, në Senigallia, Itali kanë marrë pjesë 6 nxënës dhe 3 mësimdhënës, në gara të ndryshme dhe konferenca, të cilat ishin organizuar gjatë këtyre ditëve.
Kjo garë, organizohet nga rrjeti evropian i shkollave të hotelerisë dhe turizmit AEHT, ku tri shkolla nga Kosova, janë anëtare që nga viti 2019.
Pjesëmarrja e shkollave nga Kosova, përveç garave në të cilat nxënësit ishin pjesëmarrës, kishte dhe për qëllim rrjetëzimin e shkollave evropiane dhe bashkëpunimin në projekte të ndryshme, ndërsa mësimdhënësit ishin pjesëmarrës në trajnime dhe konferenca, për trendet dhe risitë e zhvillimit të hotelerisë dhe turizmit në Evropë.
Programi SEED faza III, zbatohet nga organizata Syri i Vizionit dhe Volkshilfe Solidarität dhe financohet nga Austrian Development Cooperation ADA. /Njeshi/
