Sot filloi gjysmëvjetori i dytë në shkollat e Kosovës, ku pas pushimit dimëror nxënësit u kthyen në bankat shkollore. Megjithatë, për nxënësit dhe mësimdhënësit e shkollës “Emin Duraku” në Dragobil të Malishevës sot nuk ishte një ditë gëzimi siç e kishin pritur. Arsyeja është se ata kanë pritur që sot gjysmëvjetorin e dytë ta fillojnë në shkollën e re, por kjo nuk ndodhi, në mungesë të kompletimit të invertarit, shkruan AlbanianEducation.net.
Më datë 24 dhjetor të vitit 2024, ishte ditë gëzimi për fshatin Dragobil në Malishevë, veçanërisht për nxënësit, mësimdhënësit dhe prindërit. Arsyeja, ishte përurimi i shkollës së re që kishte nisur të ndërtohet në vitin 2019.
Në përurimin e shkollës përveç banorëve të fshatit, dhe jo vetëm morë pjesë edhe ministrja e Arsimit, Arbërie Nagavci, zyrtarë tjerë nga MASHT, poashtu drejtoresha e Arsimit në Malishevë, Arbëreshë Krasniqi. Për përuruimin e shkollës u organizua një pritje për krerët e MASHT e DKA-së, por edhe një program i pasur nga nxënësit.
Ministrja Nagavci më 24 dhjetor, kishte bërë një postim dhe publikuar foto nga prerja e shiritit, ndërsa përurimin e kësaj shkolle e qaujti si një sukses të radhës, duke thënë se do të vazhdojnë me projekte të radhës.
“Në vazhdën e aktiviteteve infrastrukturore, përuruam sot shkollën “Emin Duraku”, në Dragobil të Malishevës.
🟢Ky objekt është investim i MASHTI-t dhe ka sipërfaqe 3,134 metra katrorë. Vlera e investimit në këtë projekt është 1,176,392.76 euro.
🟢Si Ministri mbesim të përkushtuar që krahas politikave arsimore, ta përmirësojmë infrastrukturën shkollore duke e ditur rolin e rëndësishëm që ka ambienti shkollor në mësimdhënie e mësimnxënie.
📍Vazhdojmë me punë e investime tjera!”, kishte shkruar Nagavci.
Por, kjo prerje e shiritit nga Nagavci po del të jetë e ngutshme, dhe një lloj “mashtrimi”. Këtë e vërteton fakti se nxënësit e kësaj shkolle sot nuk e kanë nisur gjysmëvjetorin e dytë në shkollën e re, për shkak të mungesës së karrigeve për nxënësit.
Është vet Drejtoria e shkollës në Dragobil që ka njoftuar se shkolla e re nuk është gati për të nisur mësimin aty.
Në njoftimin e lëshuar nga Arianit Paçarizi, drejtor i shkollës “Emin Duraku” në Dragobil thuhet se mësim do të fillojnë në objektin e vjetër deri të kompletohet shkolla e re me inventarin e duhur për të filluar mësimin.
“NJOFTIM
Të dashur nxënës, të nderuar mësimdhënës/e dhe prindër, ju njofojm se ditën e mërkurë, më datën 8 janar 2025 fillon gjysmëvjetori i dytë i vitit shkollor 2024-2025.
Mësimin do e fillojmë në objektin e vjetër deri të kompletohet shkolla e re me inventarin e duhur për të filluar mësimin.
Nxënësve ju urojmë shumë suksese në mësim dhe në aktivitete shkollore dhe jashtëshkollore!
Mësimdhënësve ju urojmë përkushtim, angazhim dhe suksese në punën e tyre të çmuar!
Me respekt, drejtori i shkollës: Arianit Paçarizi!“, thuhet në njoftim.
AlbanianEducation.net ka kontaktuar Ministrinë e Arsimit të drejtuar nga Nagavci, pse është bërë përuruimi i shkollës pa qenë e gatshme, kanë thënë se deri fund të javës së ardhshme do të dërgohet invertari.
“Siç e ka sqaruar shefi i stafit në kabinetin e ministres Nagavci, Muhedin Nushi në konferencën e fundvitit, e vetmja mungesë e inventarit në objektin e shkollës në Dragobil, janë karriget. Operatori i i përcaktuar nga AQP (Autoriteti Qendror i Prokurimit) ende nuk i ka distribuuar karriget dhe besojmë që deri në fund të javës së ardhshme ky proces do të përfundojë”, thuhet në përgjigjen e MASHT-it për AlbanianEducation.net.
AlbanianEducation.net nga burimet e veta merr vesh se ministres Arbërie Nagavci, i është komunikuar lajmi se shkolla ende nuk është e gatshme për prerjen e shiritit pasi nuk e ka gjithë invertartin, por se nga MASHT kanë insistuar në prerjen e shiritit, për çka më pas Drejtoria Komunae e Arsimit në Malishevë dhe Drejtoria e shkollës e kanë pritur ministren Nagavci.
Për përurimin e shkollës në Draobil kishte bërë një postim edhe drejtoresha e Arsimit në Malishevë, Arbëreshë Krasniqi, e cila kishte shkruar se kjo shkollë ka nisur të ndërtohet gjatë kohës sa subjekti i tyre politik, NISMA Socialdemokrate, ka qenë në krye të Ministrisë së Arsimit, Shkencës dhe Teknologjisë.
Urime“, kishte bërë postimin Krasniqi më 24 dhjetor.
