Shkolla “Emin Duraku” në Prizren ka njoftuar se Narti, nxënës i klasës së shtatë ka dhuruar për bibliotekën e shkollës disa tituj librash shumë interesant, shkruan AlbanianEducation.net.
Njoftimi i shkollës:
NART KIRAJTANI DHE DASHURIA PËR LIBRAT
Narti është nxënës i klasës së shtatë në shkollën tonë. Zelli i tij për punë në shkollë dhe pasioni për librat janë lidhur ngusht mes vete për të kalitur karakterin e tij të veçantë: atë të djalit të urtë, të konsideratë dhe të sjellshëm.
Sot, Narti trokiti në derën e drejtorit, Msc Rrahim Bekteshi, me një kauzë të veçantë. Ai kishte vendosur që të dhuronte për bibliotekën e shkollës disa tituj librash shumë interesant. Ideja i lindi nga shpirtmirësia dhe ndjenja e bashkëpunimit: Narti, duke qenë se tashmë kishte lexuar librat në fjalë, mendoi që gjëja më e vlefshme do të ishte po të u jepej edhe të tjerëve mundësia që të përjetojnë botën magjike të këtyre librave sikurse ai.
“Unë kisha dëshirë që këta libra të kapen nga duart punëtore të shokëve të mi, në vend se të rrinin brenda dollapit”- na tha Narti.
Drejtori e lavdëroi veprën e Nartit duke i uruar shëndet dhe suksese, dhe duke u shprehur i lumtur që në gjirin e shkollës sonë ka nxënës që përçojnë vlera kaq të rralla, e të tillë të cilët rrugën e tyre dhe të të tjerëve përreth e ndriçojnë me dritën e librit.
