Përfaqësuesit e Sindikatës së Bashkuar të Arsimit, Shkencës dhe Kulturës (SBAShK), gjatë një takimi të zhvilluar sot me ministren e Arsimit, Shkencës, Teknologjisë dhe Inovacionit, Arbërie Nagavci, kanë bërë të ditur se në Fushë Kosovë dhe në Mitrovicë janë disa punëtorë të arsimit që nuk po marrin paga.
Sipas SBAShK-ut, në Fushë Kosovë janë 53 punëtorë të arsimit që punojnë por nuk marrin paga ndërsa në Mitrovicë rreth 80 raste të tilla.
Përfaqësuesit e SBASHK-ut kanë kërkuar nga ministrja Nagavci që të angazhohet brenda kompetencave të saj dhe në kuadër të qeverisë për ta zgjidhur këtë çështje.
Po në këtë takim përfaqësuesit e SBAShK-ut edhe një herë ia kanë kujtuar ministres Nagavci çështjet që lidhen me Ligjin e ri të pagave duke kërkuar mbështetjen dhe angazhimin e saj.
“Është ngritur edhe një herë edhe çështja e punëtorëve me sëmundje të rënda dhe SBAShK-u kërkoi nga ministrja Nagavci që edhe kjo çështje të ngritet në nivel të qeverisë për të gjetur zgjidhje të pranueshme. Në pyetjen e ngritur nga SBAShK-u lidhur me kolegët e punësuar që kanë 130 kredi, ministrja Nagavci është shprehur se çështja e tyre ka gjetur zgjidhje”, thuhet më tej njoftim.
Ministrja Nagavci theksoi se e ndan shqetësimin me SBAShK-un lidhur me punëtoret arsimor që janë duke punuar e nuk marrin paga dhe do të angazhohet për të gjetur zgjidhje të mundshme në bashkëpunim me qeveritë lokale dhe Ministrinë e Financave.
Të dy palët kanë biseduar edhe për çështjen e vlerësimit të performancës së mësimdhënësve dhe ishte vlerësim i përbashkët se vlerësimi i performancës duhet bërë sipas Udhëzimit Administrativ dhe përmes inspektorëve profesional.
