Sindikata e Arsimit ka deklaruar se e shtuna e 15 tetorit mund të konsiderohet si ditë e humbur e mësimit.
Me një deklaratë për media, SBASHK-u deklaron se MASHTI mund të jap shifra e deklarime, por realiteti në terren flet se në 70 % të institucioneve të arsimit fillor e të mesëm të ulët, këtë të shtunë nuk është mbajtur fare mësimi.
“Në pjesën tjetër, numri i nxënësve ishte tepër i vogël dhe prandaj edhe aty nuk mund të thuhet se ka pasur proces mësimor”, deklaron Sindikata e Arsimit.
Në komunikatë shkruan se kjo është vlerësuar në takimin e jashtëzakonshëm që SBASHK-u ka mbajtur me kryetarët e nivelit komunal sindikal, të cilët kanë raportuar lidhur me gjendjen e sotme në komunat e tyre.
“Në vend që të vazhdojë me presionet e me dërgimin e inspektorëve nëpër shkolla, MASHTI duhet të mendojë pa ngarkesa dhe që në fillim të javës që po vjen të mbajë takim urgjent me përfaqësues të Asociacionit të Komunave, të Kolegjiumit të DKA-ve, të Këshillit të Prindërve dhe të SBASHK-ut, për të bërë përpjekje të përbashkëta dhe për të arritur marrëveshje të pranueshme lidhur me orët e humbura në grevë”.
Sindikata deklaron se nëse nuk veprohet kështu , atëherë do të ketë situatë të njëjtë edhe në të shtunat tjera, e aq më shumë edhe në ditët e rregullta të punës, procesi mësimor nuk do të ketë rrjedhë të mbarë, nga debatet që do të zhvillohen lidhur me çështjen e orëve e ditëve të humbura në grevë.
