SBASHK sot ka filluar edhe me katër grupe të reja të trajnimit, dy prej të cilave në programin ”Forcimi i kapaciteteve për udhëheqjen efektive të dialogut social”, të cilat kanë nisur në Lipjan, me trajnerët e përzgjedhur nga SBASHK: Afrim Gashi dhe Nora Ajeti.
Mësimdhënësit që e filluan trajnimin, të shtunën i vizitoi edhe kryetari i SKAP-it për këtë komunë, Emrush Ahmeti, i cili u interesua për mbarëvajtjen e këtyre trajnimeve.
Të shtunën, me nga një grup të trajnimit në programin ”Aplikimi i programeve kompjuterike në mësimdhënie”, filluan edhe Rahoveci dhe Drenasi me trajnerët e përzgjedhur nga SBASHK, Nexhat Maçkaj, respektivisht Arbenita Gashi.
Mësimdhënësit e Rahovecit të shtunën i vizitoi edhe kryetari i SKAP-it për këtë komunë, Veli Morina, i cili u nda i kënaqur me procesin e trajnimit. Po ashtu, mësimdhënësit të cilët e filluan trajnimin në Drenas i vizitoi kryetari i SKAP-it për këtë komunë, Ilaz Dervishi, i cili u dëshiroi mësimdhënësve suksese sa më të larta në zhvillimin profesional.
Gjatë dy ditëve të këtij vikendi, SBASHK ka organizuar edhe testet për shtatë grupe të mësimdhënësve të cilët e kanë përfunduar me sukses trajnimin ”Aplikimi i programeve kompjuterike në mësimdhënie”.
Të shtunën u organizua testi për dy grupe të mësimdhënësve në Prizren, një grup në Dragash nga Sekretari i Përgjithshëm i SBASHK-ut, Ymer Ymeri, dhe zyrtarja Nezafete Jakupi. Kurse për dy grupe të mësimdhënësve në Mitrovicë, testi u administrua nga nënkryetarja e SBASHK-ut, Vjollca Shala.
SBASHK të dielën pritet të mbaj testet edhe për dy grupe të mësimdhënësve në komunën e Pejës.
