Aktivisti i njohur për çështjet e arsimit, Rron Gjinovci, ka ngritur shqetësime serioze për drejtimin që ka marrë arsimi në Kosovë, duke theksuar se një krizë e thellë po afron në nivel universitar.
“Sot fëmijët në Kosovë e kryejnë shkollën e mesme pa lexuar asnjë libër të letërsisë klasike”, u shpreh Gjinovci në një diskutim në podcastin PIKË me Veton Surroi, raporton KOHA.net.
Ai theksoi mungesën totale të interesimit intelektual te gjeneratat e reja.
GJinovci përmendi se dikur, të lexuarit ishte pjesë përbërëse e identitetit të një të riu “cool”, ndërsa sot, efikasiteti dhe përfundimi sa më i shpejtë i shkollimit janë bërë prioritet.
Gjinovci vuri në pah edhe sfidën e teknologjisë si rrezik për universitetet, ku kurset online dhe mjetet si ChatGPT tashmë ofrojnë alternativa të shpejta dhe praktike për përvetësimin e njohurive, duke rrezikuar vlerën e diplomave tradicionale.
“Sot aftësitë që i merr në universitet, mund t’i marrësh nëpërmjet kurseve online, madje me planifikim më të mirë”, shtoi ai.
Publicisti Veton Surroi theksoi dimensionin njerëzor si vlerë shtesë që ende e bën të rëndësishëm rolin e profesorit, ndonëse pranoi se teknologjia ka transformuar rrënjësisht mënyrën se si mësojmë.