Analisti Imer Mushkolaj ka bërë një rrëfim prekës për kohën kur kishte nisur studimet në Prishhtinë, me ç’rast thotë se tetori i sjell ndërmend sakrificën e familjes që ia mundësuan të shkollohet, shkruan AlbanianEducation.net.
“Kujtoj nanën që shtrëngonte duart thatë teksa më përcillte, gjyshen teksa më lëshonte në dorë pak kursime t’faluna e t’ruajtuna me kujdes, babën që m’i jepte njëqind marka t’marruna borxh, sa për ta paguar semestrin dhe një muaj jetesë në kryeqytet“, ka rrëfyer Mushkolaj përmes një postimi në Facebook.
Mushkolaj ka shkruar tutje se sa herë vjen tetori përmallohet, pasi kujton braktisjen e një fakulteti, shkaku që nuk mund t’i përballonte financiarisht mjetet e nevojshme për studime.
Postimi i tij i plotë:
Sa herë vjen tetori iu marr lakmi studentëve të rinj. Kthej kohën mbrapa, kur erdha të studioj në Prishtinë.
Sa herë vjen tetori sjell ndërmend sakrificën e familjes për të më mundësuar të vazhdoj shkollimin.
Kujtoj nanën që shtrëngonte duart thatë teksa më përcillte, gjyshen teksa më lëshonte në dorë pak kursime t’faluna e t’ruajtuna me kujdes, babën që m’i jepte njëqind marka t’marruna borxh, sa për ta paguar semestrin dhe një muaj jetesë në kryeqytet.
Sa herë vjen tetori përmallohem, përderisa kujtoj braktisjen e një fakulteti, shkaku që nuk mund t’i përballoja financiarisht mjetet e nevojshme për studime.
Sa herë vjen tetori më vijnë ndërmend baba, gjyshja e nana që nuk jetojnë ma, e të cilët jetuan një jetë të vështirë, por plot dinjitet.
M’kujtohet dashnia e pamasë që ma dhanë, e unë ndihem borxhli ndaj tyre. Borxhli e i përulur përjetësisht.
Sa herë vjen tetori.
