“Kërkojmë të ngritët vlera e koeficientit”, “Duam dialog social”, “Qeveri respekto pensionistët”, ishin disa nga pankartat që kanë mbajtur në duar protestuesit më 1 Maj në protestën e organizuar nga SBASHK-u.
Për këto kërkesa së fundmi ka folur kreu i SBASHK, Rrahman Jasharaj, i cili ka deklaruar se sindikata do të vazhdojë përpjekjet për dialog dhe realizimin e kërkesave legjitime të anëtarësisë, të cilat u shfaqën në protestën e 1 majit 2024.
Kështu ka thënë ai pas takimeve në shtatë regjionet e Kosovës (Pejë, Gjakovë, Prizren, Ferizaj, Prishtinë, Mitrovicë, Gjilan), ku kanë diskutuar rreth organizimit sindikal në Republikën e Kosovës, dialogun social, rolin e shoqërisë civile në mbështetje të sindikatave, si dhe prezantimin e “Doracakut për shpalljen e grevës së ligjshme”, takime që janë organizuar nga Instituti i Kosovës për Drejtësi (IKD), me ftesë dhe në bashkëpunim me Sindikatën e Bashkuar të Arsimit, Shkencës dhe Kulturës së Kosovës (SBASHK), dhe me mbështetjen e Qendrës së Solidaritetit.
Jasharaj, shprehu falënderime të veçanta për veprimtarët sindikalë, duke theksuar përkushtimin dhe angazhimin e tyre të palodhur në mbështetje të anëtarësisë.
Ai vlerësoi rolin e Steven dhe të Qendrës së Solidaritetit Amerikan, si një partner i rëndësishëm në përkrahjen e SBASHK-ut, dhe kontributin e dhënë në zhvillimin dhe përparimin e organizatës.
Jasharaj rikujtoi me krenari miqësinë e ndërtuar gjatë viteve të vështira për arsimin shqip, veçanërisht me Sindikatën e Mësuesve të Amerikës dhe me sindikata simotra nga vende të ndryshme të Evropës dhe botës.
“Bashkëpunimet e tilla kanë luajtur një rol kyç në fuqizimin e zërit sindikal, duke ndihmuar në përmirësimin e kushteve të punës për mësimdhënësit dhe në avancimin e të drejtave të tyre”, shtoi Jasharaj.
Ai theksoi se miqësitë dhe lidhjet ndërkombëtare të sindikatës vazhdojnë të jenë burim inspirimi dhe mbështetjeje, duke forcuar pozicionin e sindikatës në nivel kombëtar dhe ndërkombëtar.
Më tutje, ai tha se sindikata do të vazhdojë përpjekjet për dialog dhe realizimin e kërkesave legjitime të anëtarësisë, të cilat u shfaqën në protestën e 1 majit 2024.
Krejt në fund të fjalës së tij në këto takime, Kryetari i SBASHK-ut ka përgëzuar Institutin e Kosovës për Drejtësi për angazhimin, bashkëpunimin korrekt dhe për përgatitjen e doracakut për shpalljen e grevës së ligjshme. Ai vlerësoi kontributin e IKD-së në mbështetjen e sindikatës dhe përpjekjet e tyre për të ndihmuar në mbrojtjen e të drejtave të punëtorëve./AlbanianEducation.net./.
