Kryetari i SBASHK-ut, Rrahman Jasharaj, thotë se e keqja në arsimin kosovar do të vijë pas 20 prillit. Ai thotë se qeveria e udhëhequr nga Albin Kurti nuk ka pranuar të dialogojë pavarësisht kërkesave nga ana e tyre.
Jasharaj nuk përjashton mundësinë e protestave.
“Janë kërkesa të shumta, por as një takim nuk ka ndodhur. Fatkeqësia e madhe është se qeveria Kurti ka një qëndrim jashtëzakonisht të keq ndaj sindikatave dhe po ashtu ndaj dialogut. Pra, e keqja më e madhe vjen pas 20 prillit, e kam fjalën për sistemin arsimor por nuk i përjashtojmë as protestat nëse BSPK’ja me Federatat e tjera e sheh një gjë të tillë, qoftë për 1 Maj qoftë për një ditë tjetër, do të jemi pjesë e protestave por me numër jo të madh”, tha Jasharaj për KTV’në.
Ai kritikoi edhe zëvendësministrin e Arsimit, Dukagjin Popovci.
“Pastaj del z.Popovci thotë “po more ligji do të bëhet”. Ne jemi lodh qe pesë vjet me “do të bëhet”. Pastaj thotë: “është turp të kërkohen nga qeveria nga 100 euro, po nëse është turp 100, ana more vlla nga 400, na nuk themi jo””, shpjegoi Jasharaj.
“Po së paku na jepini nga 100 që të përballemi me këto shtrenjtime. Unë po them nëse vazhdon qeveria Kurti kështu, do të ketë telashe dhe unë e thash edhe sot zyrtarisht atje, dikujt do t’i dalë keq kjo punë, por do t’i dalë keq qeverisë Kurti sepse ne do të flasim edhe me prind”, theksoi ai.
