Më 7 mars 2024, ditë simbolike për arsimin, Rrjeti i OShC-ve për Arsimin Parauniversitar (ROSCAP) njoftoi publikun për lansimin e peticionit duke kërkuar nga Kuvendi i Kosovës të:
1. Hartojë Projektligjin për pensionimin e vullnetshëm të parakohshëm të mësimdhënësve të moshës 55 deri 64 vjeç në arsimin parauniversitar.
2. Amandamentojë nenin 5 dhe nenin 13 të Ligjit Nr. 04/L-032 për Arsim Paraunivesitar, ashtu që t’i obligojë institucionet e Kosvës të ndërmarrin veprime konkrete për ri-organizimin e të gjitha shkollave me më pak se 60 nxënës.
3. Amandamentojë nenin 33 të Ligjit Nr. 04/L-032 për Arsim Paraunivesitar, duke shtuar dispozita për vlerësimin vjetor të aftësive dhe njohurive të mësimdhënies për të gjithë mësimdhënësit.
Sot, konform Kushtetutës së Republikës së Kosovës dhe Ligjit Nr. 04/L-025 për Nisma Legjislative, Rrjeti i OShC-ve për Arsimin Parauniversitar (ROSCAP) ceremonialisht ia dorëzoi kryetarit të Kuvendit të Republikës së Kosovës, Glauk Konjufca, dosjen e peticionit me gjithsej 12526 nënshkrime të qytetarëve të Kosovës.
Rrjeti i OShC-ve për Arsimin Parauniversitar (ROSCAP) mbetet i përkushtuar fuqishëm për jetësimin e vullnetit qytetar për arsim cilësor!
Rrjeti i OShC-ve për Arsimin Parauniversitar (ROSCAP) përbëhet nga BONEVET, ETEA, Qendra per Studime te Avancuara FIT, Kosova Education Center – KEC, Kosovar Youth Council – KYC, LAPS, ORCA Organizata për Rritjen e Cilësisë në Arsim, PEN – Peer Educators Network, Qendra për Hulumtime Psiko-Sociale dhe Mjekësore, Qendra Kosovare për Studime Gjinore, SOS Fshatrat e Fëmijëve Kosovë, Teach For Kosova, TOKA dhe Voice of Roma, Ashkali and Egyptians.
