Kryesindikalisti i punëtorëve të arsimit, Rrahman Jasharaj, është lajmëruar pas një kohe të gjatë duke bërë një varg akuzash ndaj kryeministrit Kurti, mes të cilave edhe për atë që e solli mbrëmë nga Brukseli për Kosovën.
Në artikullin e titulluar “Qeveria Kurti nuk e meritoi heshtjen e 1 majit” ai thotë që e vetmja arsye pse kanë heshtur është se sipas tij zhurma i duhej Kurtit në mënyrë që të fshehte dështimet në dialog.
Adresimi i tij i dërguar me shkrim për mediat e shkruara është mjaft prekës. Ai aty tregon edhe mënyrën se si kishte nisur linçimi pikërisht në kohën e dialogut me Serbinë më 18 gusht.
“Mediet e dinë se në gushtin e vitit të kaluar ishte Kryeministri Kurti që për dështimet e veta në dialogun e asaj kohe në Bruksel u mundua t’ua adresojë sindikatave dhe duke nisur mesazh linçimi kishte përmendur edhe emra konkretë të udhëheqësve sindikalë e në veçanti “babën e grevave“” – shprehet fillimisht z. Jashari.
Në deklaratën e tij më të fortë qe sa kohë, ai thotë si vijon:
“Nuk penguam Kurtin në Bruksel, por shikoni se çfarë na solli nga atje.”
Kujtojmë që gazeta Nacionale e kishte shpallur z. Jasharaj “Personalitet të Vitit 2022” për shkak të rezistencës së tij të gjatë ndaj sulmeve të pareshtura nga aktivistët e VV-së që ishin nisur nga vetë kryeministri Kurti dhe gjuha e tij bullizuese e linçuese.
Kujtojmë se më 18 gusht të vitit të kaluar ishte paralajmëruar greva e BSPK-së, ashtu siç parashihej me ligj, për t’u shpallur pastaj më 25 gusht. Kurti e kishte lidhur shpalljen e grevës – ani që ajo ishte paralajmëruar me muaj të tërë si mundësi – si një obstruksion në dialogun e tij me Serbinë.
Komunikata e plotë:
Mediet e dinë se në gushtin e vitit të kaluar ishte Kryeministri Kurti që për dështimet e veta në dialogun e asaj kohe në Bruksel u mundua t’ua adresojë sindikatave dhe duke nisur mesazh linçimi kishte përmendur edhe emra konkretë të udhëheqësve sindikalë e në veçanti “babën e grevave“ . “Kur unë shkova të përballesha me Serbinë , më thanë se shiko se në shtetin tënd ka grevë”, kishte thënë Kurti duke përcjellë mesazhin te mbështetësit e tij e sidomos të ushtria e tij në Facebook se greva e paralajmëruar e BSPK-së i paska ulur forcën goditëse Kurtit.
Unë si përfaqësues i SBASHK-ut ka kohë që nuk po flas dhe i kam lutur gjithë kolegët e mi sindikalistë në arsim që të heshtim për një kohë karshi gjithë përpjekjeve të Qeverisë Kurti dhe ekzekutorit Murati që të na zhdukin nga faqja e dheut me sulme, me shpifje drejtuar institucione të drejtësisë, me lajme të rreme për anulimin e Kontratës Kolektive sepse zhurma e veprimet tona sindikale i duhen Kurtit.
Ne në marrëveshje me numrin më të madh të anëtarësisë e duke treguar unitet heshtëm më 1 maj kur kolegët tanë sindikalistë në Evropë e në botë maj organizuan protesta sepse Kryeministri Kurti do të deklaronte në medie dhe ushtria e tij bashkë me do faqezezë analistë do të drejtonin sulme ndaj atyre që mbajtën gjallë arsimin në vitet e 90-ta. Nuk penguam Kurtin në Bruksel, por shikoni se çfarë na solli nga atje.
Rrahman Jasharaj
Kryetar i SBASHK -ut
