Në shkollën “Katër Dëshmorët” në fshatin Ratkoc tëRahovecit u organizua sot një ligjëratë me karakter edukativ dhe sensibilizues, kushtuar sakrificës së prindërve, në bashkëpunim me psikologen Liridona Thaqi, shkruan AlbanianEducation.net.
Gjatë ligjëratës, nxënësit patën mundësinë të ndjekin materiale vizuale që pasqyronin përkushtimin e përditshëm të prindërve ndaj fëmijëve të tyre, duke vënë në pah përpjekjet e heshtura, lodhjen, durimin dhe dashurinë e pakushtëzuar që shpesh mbetet e pathënë.
Mesazhi kryesor i ligjëratës u përqendrua në rëndësinë e vlerësimit të këtyre sakrificave dhe në ndërgjegjësimin e të rinjve për rolin jetik të prindërve në formimin e tyre.
Njoftimi i shkollës:
Ligjëratë mbi sakrificën e prindërve
Sot, në shkollën tonë, u mbajt një ligjëratë tejet emocionale dhe reflektuese mbi sakrificën e prindërve, në bashkëpunim me psikologen Liridona Thaqi. Ky aktivitet u shndërrua në një moment të veçantë ndërgjegjësimi për nxënësit, duke prekur thellë zemrat e të gjithëve.
Gjatë ligjëratës, fëmijët patën mundësinë të shikojnë video prekëse për sakrificën e prindërve, ku u pasqyruan net pa gjumë, lodhja e heshtur, duart e çara nga puna dhe lotët që nuk u panë kurrë por që mbajtën gjallë ëndrrat e fëmijëve të tyre.
Sakrifica e prindërve nuk kërkon falënderim me zë të lartë.
Ajo jeton në heshtje, në durim, në dashuri të pakushtëzuar.
Një lot i prindërve peshon më shumë se mijëra fjalë, sepse brenda tij ka frikë, shpresë dhe lutje për të ardhmen e fëmijës.
Këshillë për nxënësit:
Respektoni prindërit tuaj çdo ditë.
Mos e merrni si të mirëqenë sakrificën e tyre.
Mësoni, përpiquni dhe bëhuni arsyeja pse lodhja e tyre merr kuptim.
Sepse suksesi juaj është shpërblimi më i madh për sakrificën e tyre.
