Përveç efekteve të tjera të shumta të dobishme, qumështi i gjirit mbron të porsalindurit nga Covid-19.
Në fakt, ai ka aftësinë të përmirësojë mbrojtjen natyrale të fëmijës kundër efekteve të dëmshme të Sars-CoV-2. Konfirmimi vjen nga një studim shkencor i kryer nga dy qendra të rëndësishme në Romë.
Roli i qumështit të gjirit
Studiuesit e Spitalit Pediatrik Bambino Gesù, në një studim të kryer në bashkëpunim me Policlinico Umberto I në Romë dhe të publikuar në Jama Netëork Open, donin të thellonin rolin e këtij ushqimi thelbësor për foshnjat e porsalindura, në luftën e trupit kundër koronavirus.
28 gra u regjistruan së bashku me foshnjat e tyre. Gratë kishin lindur në Policlinico Umberto I midis nëntorit 2020 dhe majit 2021 dhe të gjitha kishin rezultuar pozitive në tamponin e kryer në momentin e lindjes, megjithëse shumë prej tyre ishin asimptomatike. Asnjë në atë kohë nuk ishte vaksinuar kundër Covid-19. Qëllimi ishte të konstatohej nëse dhe si kjo gjendje e nënës në momentin e lindjes ndikoi në mbrojtjen imune të foshnjës.
Një mbrojtje e dyfishtë
Kur vjen në jetë, foshnja mbrohet nga antitrupat që nëna ia transferon nëpërmjet placentës. Këto antitrupa janë imunoglobulina të tipit IgG, të cilat trupi i nënës i prodhon pas infeksioneve ose vaksinimeve. Në këtë mënyrë foshnja, të paktën në muajt e parë të jetës, mbrohet nga disa infeksione, duke pritur që sistemi imunitar të prodhojë të tijat. Një nënë që ushqen me gji i transferon foshnjës edhe antitrupat IgA, të quajtura mukozale, sepse ato prodhohen nga mukozat e rrugëve të frymëmarrjes dhe zorrëve të nënës dhe sepse ndihmojnë të porsalindurin kundër infeksioneve të mukozës, si ftohja dhe gripi.
Antitrupat tashmë pas 48 orësh
Por si mbron qumështi i gjirit nga Covid-19? Ekspertët janë fokusuar në mënyrën se si funksionon ky mekanizëm mbrojtës në rastin e nënave me koronavirus pozitiv në momentin e lindjes. Ata identifikuan dhe vlerësuan praninë e imunoglobulinave specifike kundër Sars-CoV-2 si në gjakun dhe qumështin e nënave, ashtu edhe në gjakun dhe pështymën e foshnjave. U zbulua se antitrupat specifikë për virusin ishin të pranishëm në gjakun e nënave dy muaj pas lindjes, por jo 48 orë. Sistemit të mbrojtjes i nevojiten dy javë për të prodhuar imunoglobulinat IgG. Në qumësht, nga ana tjetër, antitrupat specifikë IgA ishin tashmë të pranishme 48 orë pas lindjes, pasi përgjigja e mukozave për prodhimin e antitrupave është më e shpejtë se përgjigja sistemike e trupit.
Stimulimi natyror i mbrojtjeve
Antitrupat e mukozës ndaj virusit ishin gjithashtu të pranishëm dy muaj pas lindjes, por vetëm tek foshnjat që ushqeheshin me gji, edhe pse nënat e kishin ndërprerë prodhimin e tyre. Për studiuesit, është dëshmi se qumështi i gjirit mbron nga Covid-19, duke ofruar gjithashtu mbrojtje aktive dhe pasive, pra duke transferuar antitrupat e prodhuara nga nëna te foshnja, por edhe duke e ndihmuar atë të prodhojë në mënyrë të pavarur mbrojtjen e tij imune.
Gjidhënia funksionon si një vaksinë
Mekanizmi duket të jetë i ngjashëm me atë të një vaksine. IgA e prodhuar nga nënat e infektuara lidhet me proteinën Spike të shprehur në sipërfaqen e virusit duke formuar kompleksin imunitar, një molekulë që kalon nga nëna te i porsalinduri gjatë ushqyerjes me gji. Kompleksi IgA-Spike i trashëguar nga nëna rezulton imunogjen, domethënë stimulon sistemin imunitar për të prodhuar antitrupa.
Qumështi i gjirit mund të ndihmojë foshnjën të zhvillojë mbrojtjen e tyre imune. Sistemi mund të funksionojë në të njëjtën mënyrë për shumë agjentë të tjerë të dëmshëm, të cilët janë të pranishëm tek nëna gjatë ushqyerjes me gji.
