Nxënësit shqiptarë nga Lugina e Preshevës që jetojnë në vendin tonë nuk po subvencionohen për tekste shkollore. Edhe pas fillimit të vitit të ri shkollor, ata nuk janë pajisur me libra e materiale të tjera. Në mungesë të dokumenteve të Kosovës, prindërit e tyre nuk mund të aplikojnë në platformën eKosova për subvencionim. E derisa kjo po konsiderohet padrejtësi nga njohës të sistemit të arsimit, ministrja e Arsimit, Arbërie Nagavci zotohet se asnjë nxënës nuk do të mbes pa tekste mësimore.
Një prind nga Medvegja i ka thënë KosovaPress-it, se nuk ka mundësi që vet të blejë librat për dy fëmijët e tij.
Agimi, i cili flet në kushte anonimiteti tregon se dy fëmijët të cilët vijojnë mësimin në Prishtinë, ende nuk janë pajisur me libra. Ai tregon se ata kanë lindur në Kosovë, por ai vet është pajisur së fundmi me leje qëndrim.
Që nga fillimi kur është hapur mundësia për aplikim të subvencionimit të teksteve shkollore, ai tregon se kanë njoftuar ministrinë e drejtorinë e shkollës por nuk kanë marrë përgjigje.
Rinor Qehaja, drejtor në Institutin për Studime të Arsimit “EdGuard”, thotë për KosovaPress, se praktika e subvencionimti të teksteve shkollore ka disa të meta.
Ai thekson se ka raste të keqpërdorimit të këtyre mjeteve, kur diaspora aplikon ani pse fëmijët nuk vijojnë mësimin në Kosovë.
Ndërkaq, ministrja e Arsimit, Arbërie Nagavci zotohet se asnjë nxënës nuk do të mbes pa tekste mësimore.
KosovaPress ka provuar të marrë një përgjigje nga Qeveria e Kosovës për lehtësirat që po aplikohen për pajisje me dokumente të Kosovës nga banorët e Luginës së Preshevës, megjithatë deri në publikimin e këtij artikulli nuk kanë kthyer përgjigje.
