Eksperti i arsimit, Dukagjin Pupovci, e ngreh shqetësim numrin gjithnjë e më të ulët të nxënësve nëpër shkollat në Kosovë.
Ai ka thënë se për arsimin buxheti nuk është problem, aq sa është numri në rënie i nxënësve.
Siç ka thënë Pupovci, numri i nxënësve në vend është i njëjtë me atë që ka qenë para mbi 50 vjetësh.
“Mendoj që buxheti nuk është më problemi kryesor, ne numri i nxënësve na zvogëlohet çdo vit. Sivjet janë diku 313 mijë nxënës, kaq i kemi pasur në vitin 1970, bile pak më shumë kanë qenë më 1970 kur Kosova i ka pasur 1.2 milionë banorë. Sot i ka 1.8, por numri i nxënësve çdo vit në Kosovë po zvogëlohet”.
Sipas Pupovcit, problemi me klasat e mëdha ku ka më shumë nxënës se që duhet, ekziston vetëm në qytete të mëdha.
“Problemet që po përmenden klasat e mëdha, janë problem vetëm në qytete të mëdha. Janë 50 shkolla në Kosovë që i kanë mbi 1000 nxënës. Janë 200 shkolla që i kanë nën 50 nxënës. Të tjerat janë në mes, nuk e kanë problemin. Buxheti nuk është problem, problem është si të shfrytëzohet buxheti për avancimin e gjendjes në arsim”. /KOHA/
