Ish-zëvendësministri i Arsimit, Dukagjin Pupovci, deklaroi se problemi i kopjimit në shkolla buron nga mentaliteti i shoqërisë, që siç tha ai, nuk konsiderohet e turpshme të bëhet diçka “që është joetike”.
Sipas Pupovcit, prindërit ua kryejnë fëmijëve të tyre detyrat e shkollës, duke mashtruar mësimdhënësin dhe duke i kultivuar fëmijës shprehi jo të mira.
Ai deklaroi se shteti i Kosovës tash e 20 vjet s’ka arritur t’i mobilizojë njerëzit që të bëjnë ndryshime në sistemin e arsimit, pasi sipas tij, gjithmonë diskutohet për paga dhe zëvendësime të orëve të humbura.
“Problemi i kopjimit buron nga mentaliteti i shoqërisë që s’është turp të bësh diçka që është joetike. Ua mbjellim fëmijëve se si kopjojnë e duke mos reaguar. Ndodh që fëmijës ia bën prindi detyrat dhe e mëson. E mashtron mësuesin, por fëmijës ia kultivon shprehitë jo të mira…Mësimdhënësit i kemi çuar për të folur mbi pagat, por jo shkollat të angazhohen në përmirësimin e testit”, tha ai.
Sipas njohësit të çështjeve të arsimit, Kosova mund të arsyetohet me krizën e pandemisë që kishte stanguar disa procese, por ai tha se mungesa e mobilizimit të përgjithshëm është evidente.
“Jo që mungojnë plane, por zbatimi i asaj që planifikohet mungon… Kemi dëgjuar duke thënë ‘ky vit shkollor veç vit nuk mund të quhet’. 1 muaj grevë u desh të kompensohej të shtunave, prindërit bënin thirrje për moszëvendësim të orëve të mësimit…Komunat sabotonin zëvendësimin e mësimit. Nuk po arrin asnjë pushtet t’i mobilizojë njerëzit të bëjnë këto ndryshime”, shtoi ai. /KOHA/
