Mbrojtja e diplomës është shndërruar në një ceremoni simbolike, ku ftohen familjarët, organizohet pritje, dhe studenti shpesh vlerësohet me notën maksimale.
Kështu e vlerëson mbrojtjen e diplomës njohësi i arsimit dhe ish-zëvendësministri i Arsimit, Dukagjin Pupovci.
Ai thekson se shumë herë, temat e diplomës kalojnë pa një verifikim serioz të dijes dhe pa konfirmuar autorësinë e punimit, raporton Kiks Kosova.
Në mungesë të kontrollit real, thotë Pupovci, është e pritshme që një numër i konsiderueshëm studentësh të zgjedhin rrugën më të lehtë t’ia besojnë temën e diplomës dikujt tjetër.
Andaj, sipas tij, nëse profesorët do ta ushtronin me seriozitet mbikëqyrjen akademike, praktika të tilla do të ishin shumë më të vështira për t’u realizuar.
Pupovci ngre shqetësim edhe për mungesën e ndëshkueshmërisë për plagjiaturën.
Ai shton se ndonëse ka profesorë që e mentorojnë temën e diplomës me përgjegjësi të lartë, ka edhe raste kur studenti takohet me mentorin vetëm në ditën e mbrojtjes.
E për shkak të legjislacionit të kufizuar, Pupovci vlerëson se këto raste trajtohen më shumë si shkelje etike sesa penale. /Klankosova.tv
