Punëtorët teknikë të 10 shkollave në Prishtinë të premten kërcënuan me grevë nëse me tenderin e Komunës për kontratat e reja nuk do t’u rritet paga nga 250 në 300 euro. Pas këtij kërcënimi sindikal, një orë pas, Komuna vendosi që me kontratat e reja punëtorët teknikë t’i kenë pagat 300 euro bruto.
Në një zyrë të ngushtë të Sindikatës së Punëtorëve të Sektorit Privat, të premten u mblodhën përfaqësues të punëtorëve teknikë të 10 shkollave të Prishtinës për ta shprehur një kërkesë e edhe një paralajmërim për Komunën.
Ata po pretendojnë se në një tender të hapur nga Komuna e Prishtinës, që do t’i jepej një kompanie për mirëmbajtjen e shkollave, ishte përcaktuar që me kontratën e re një punëtor teknik të paguhej 300 euro, por më pas Komuna e kishte ulur sërish në 250, sa kishte qenë. Për këtë punëtorët teknikë e kërcënuan me grevë Komunën, nëse pagat e tyre nuk do të rriten për 50 euro.
“Sot është marrë vendim që nëse deri të hënën në orën 16:00 nuk kemi dokument zyrtar për rritjen e pagave, të martën në orën 12:00 do të takohemi dhe nëse kërkesat tona nuk përmbushen, do të hyjmë në grevë dhe më nuk do të kryejmë asnjë shërbim deri në përfundim të kërkesave”, ka thënë kryetari i SPSPK-së, Jusuf Azemi.
Por, ky presion sindikal ndikoi që veç një orë pas, sipas njoftimit të Azemit, Komuna të vendosë që paga në kontratën e radhës për këta punëtorë të jetë 300 euro.
Për 24 vjet sa ka kryer punë teknike në shkollën “Pjetër Bogdani” në Prishtinë, Fazli Idrizi thotë se më së shumti është paguar 250 euro në muaj.
Për të është i papranueshëm dallimi në pagë me punëtorët që kryejnë të njëjtën punë, por që janë të kontraktuar nga sektori publik.
“Është më së vështiri kur një koleg i imi, i cili e ka rrogën 380 dhe e bëjmë të njëjtën punë e unë i marr 250 euro. Kjo është katastrofë. Me 250 euro unë familjen nuk po mund ta mbaj”, ka thënë Idrizi.
Përveç këtij problemi, disa punëtorë teknikë e kanë edhe një telash tjetër me tenderët e Komunës.
Rukie Sllovinja, punëtore në shkollën “Qamil Batalli”, ka thënë se për punën e bërë në muajin shkurt nuk ka marrë fare pagë.
“Prej 2 shkurtit ne jemi pa rrogë. Komuna nuk na ka njoftuar në fillim të shkurtit se ka skaduar kontrata e operatorit dhe ne kemi punuar një muaj kështu. Nuk e kemi ditur. Ne jemi pa rrogë”, thotë ajo.
Se pse nuk janë njoftuar me kohë dhe se a do të kompensohen për punën që kanë bërë, KOHA ka dërguar pyetje në Komunën e Prishtinës. Por, nuk ka marrë përgjigje gjatë ditës.
© KOHA
