Mosha nuk është faktori kyç që determinon se kur fëmija është i gatshëm të fillojë shkollën. Psikologia për fëmijë, Naile Rrustolli, tha të hënën në emisionin SOT në KTV, se mosha 6-vjeçare nuk është domosdoshmërisht e duhura për startimin e këtij cikli të ri jetësor. Sipas saj, është pjekuria e tyre që tregon nëse ata janë të gatshëm për të filluar ose jo.
“Duhet pasur parasysh këtë gjë, nëse vetëm dërgohet pa i pasur këta faktorë të cilët ndikojnë, do të ketë shumë sfida si për fëmijën edhe për prindin. Kemi të bëjmë me fushat e zhvillimit të fëmijës, atë kognitiv, emocional, sa është i gatshëm fëmija të marrë vendime, sa po ndërvepron me të tjerët”, ka thënë ajo.
Ajo ka thënë se fillimi i shkollës për fëmijët nën moshën 6-vjeç është i hershëm për ta në aspektin socio-emocional.
“Në zhvillimin e shkathtësive akademike, mund të ketë fëmijë që është i përgatitur për të shkruar, por në aspektin e zhvillimit socio-emocional mosha e hershme nuk rekomandohet pasi fëmija nuk ka hapësirë të luajë me fëmijët e tjerë, ta përjetojë fëmijërinë por po vjen një ngarkesë qysh nga mosha e hershme, kjo mund të ndikojë në motivin e fëmijës qysh nga mosha e hershme”, ka thënë ajo.
Gjatë dy vjetëve të fundit, Rrustolli ka thënë se ka rritje të vetëdijes te prindërit në aspektin e referimit te psikologu nëse fëmija has në vështirësi që nuk mund të tejkalohen me ndihmën e familjarëve.
“Unë i inkurajoj prindërit që para fillimit të vitit të ri shkollor t’u lënë hapësirë fëmijëve që të organizohen vetë, t’i zhvillojnë shkathtësitë e organizimit, sa më të pavarur që janë fëmijët paraprakisht, do të jenë më të përgatitur, kjo do ta rrisë edhe vetëbesimin e fëmijëve”, ka shtuar ajo.
